Кисә Мәжит Ғафури исемендәге Башҡорт дәүләт академия драма театрында 8-се тапҡыр үткәрелгән ҡала конкурсының Гала-концерты үтте. Халыҡ ижадын һөйөүсе ҡыҙҙар-малайҙар тәүҙә бәйгенең район этаптарында көс һынашһа, артабан ҡала конкурсында һынау тотто. Донъя халыҡтары әкиәттәрен башҡорт телендә тасури һөйләүҙә  оҫталыҡ күрһәткән кескәйҙәргә Гала-концертта сығыш яһау бәхете эләкте.

Кескәйҙәр күҙҙәрендә осҡон , күңелдәрендә дәрт. Улар ҡала конкурсының Гала-концертында ҡатнашыуҙарына сикһеҙ шат. Башҡорт йәкшәмбе мәктәбенең фольклор коллективы «Бай һәм ҡазый» үзбәк халыҡ әкиәтен сәхнәләштерҙе. Әйтергә кәрәк, балалар ролдәрен килештереп уйнаны.
«Һаумы, һаумы әкиәт!»  конкурсында  ҡатнашҡан әкиәт һөйләүсе малай-ҡыҙҙарҙы тәрбиәләгән ғаиләләрҙең күп булыуы ҡыуандырҙы. Сөнки тыуған телгә, илгә,  халҡыбыҙҙың ғөрөф-ғәҙәттәренә һөйөү һәм ихтирамды балаға ғаиләлә, ата-әсә тәрбиәһе аша ғына биреп була. Шуға сараның тап бөгөн - Ғаилә көнөндә үтеүе лә осраҡлы түгел. 
Сығыш яһағанда үҙен батыр тотҡан, актерҙарса оҫталыҡ менән сығыш яһаған кескәйҙәр сәхнә артында бер аҙ юғалып ҡала. Бер көн эсендә әллә күмпе иғтибар тойған бәләкәстәр арып та китәлер. күрәһең. Шулай ҙа уларҙың киләһе йыл конкурста тағы ла ҡатнашырға теләктәре бар.
Кескәйҙәрҙең әкиәтте тасури һәйләү оҫталығы, үҙҙәрен сәхнәлә дөрөҫ тота белеүҙәре һәм бигерәк тә башҡорт телендә саф һәм таҙа һөйләшеүҙҙәре сараның бер ғорурлығы булып тора. Йыр-моңға үрелеп барған байрам балаларға ғына түгел ,өлкәндәр өсөн дә мажараларға бай булды.
Гала концертта ҡатнашыусылар уйын-көлкө донъяһына ла сәйәхәт ҡылды. Әкиәт иле менән таныштырыусы йәш артистар сара аҙағында маҡтау ҡағыҙҙары һәм ҡиммәтле бүләктәр менән бүләкләнде.

Сығанаҡ: http://tv-rb.ru/bash/novosti/m-ni-t/aumy-aumy-ki-t-/