21, 22 февраль көндәрендә М.Ғафури исемендәге Башҡорт дәүләт академия драмы театры йәнә премьера тәҡдим итә. С.Айытматов, Е.Баранчикованың сәхнә версияһы буйынса «Сыңғыҙхандың аҡ болото» спектакленең режиссеры — Мөсәлим Күлбаев, балетмейстеры — Ирина Филиппова, рәссамы— Альберт Нестеров, композиторы — Урал Иҙелбаев.

Төп ролдә — Рәсәйҙең һәм Башҡортостандың халыҡ артисы, С.Юлаев ис.дәүләт премияһы лауреаты Хөрмәтулла Үтәшев.
«Сыңғыҙхан — ул көслө хөкүмәт башлығы. Мин уны кешелекле яҡтан күрһәтергә тырышам. Сыңғыҙхан — ул ир ҙә, дуҫ та… Күп ҡырлы герой буласаҡ», — тине Хөрмәтулла Ғаззали улы.

Иҫегеҙгә төшөрәбеҙ, 2002 йылда Х.Үтәшев Төрки телле театрҙарҙың «Нәүрүз» һәм 2003 йылда «АРТ-ОРДО» (Бешкәк) Халыҡ-ара фестивалендә Нурлан Абдыҡадыровтың «Сыңғыҙхандың һуңғы төйәге» спектаклендәге Тимерша роле өсөн фестивалдең «Иң яҡшы ир-ат роле» призына лайыҡ була.