4 март көнө Х. Әхмәтов исемендәге Башҡорт дәүләт филармонияһының  "Карауан" эстрада төркөмө егеттәре өр-яңы юбилей программаһы менән сығыш яһай.  Яратҡан йырҙар, көтөлмәгән бүләктәр-барыһы ла бер сәхнәлә!

Тамашала "КАРАУАН" егеттәре - Рөстәм Шаһыбалов, Марсель Ҡотоев, Тимур Рамаҙанов, Эльмир Әбүбәкиров, шулай уҡ, Заһир Иҫәнсурин, Регина Баракова, Екатерина Ямщикова һәм башҡа сәхнә йондоҙҙарының  ҡатнашыуы көтөлә.

     Республикабыҙҙа һәм сит өлкәләрҙә милли музыка мәҙәниәтен пропагандалаусы халыҡ ара, Бөтә Рәсәй һәм республика конкурстары лауреаты «КАРАУАН» төркөмө тәүге юбилей концертына саҡыра. Ҡыҫҡа ғына ваҡыт эсендә тамашасы һөйөүен яулап, йырҙары менән күңел ҡылдарын тирбәтеп, ун йыл дауамында эстрадабыҙҙың ғорурлығы булып балҡыған төркөм «Йыйын» тип исемләнгән тамаша тәҡдим итә. Концерттың режиссеры Илшат Фәхертдинов әйтеүенсә, программала тамашасы күңелен әсир иткән йырҙар, премьералар һәм ижади дуҫтарының матур сығыштары көтөлә.

      Бөгөн «КАРАУАН»да йәш талантлы һәм дәрте ташып торған егеттәр ижад итә: халыҡ-ара һәм республика конкурсы лауреаты, киң диапазонлы, халыҡ йырҙарын оҫта башҡарыусы булараҡ танылыу яулаған йырсы Марсель ҠОТОЕВ; «Гәлсәр һандуғас» телевизион конкурсы аша билдәлелек яулаған, үткән миҙгелдә «Минең юлым» исемле беренсе шәхси программаһы менән тамашасыларҙы таң ҡалдырған, үҙенсәлекле тауышлы йырсы, халыҡ-ара, Бөтә Рәсәй һәм республика конкурстары лауреаты Рөстәм ШАҺЫБАЛОВ; талантлы башҡарыусы, халыҡ-ара һәм республика конкурстары лауреаты Тимур РАМАЗАНОВ; республика конкурстары лауреаты, думбырасы Эльмир ӘБҮБӘКИРОВ һәм донъя халыҡтары бейеүҙәре менән концерттарҙы биҙәүсе, йәш бейеүсе Регина БАРАКОВА. «Карауан» төркөмө концертында рух, мөхәббәт һәм халыҡ-ара дуҫлыҡ темалары сағыла.

       Тамашасылар өсөн «КАРАУАН» төркөмө тағы ла үҙенсәлекле бүләк әҙерләгән. Ниндәй бүләк икәнлеген беләһең килһә «Йыйын»ға рәхим итегеҙ!

«КАРАУАН»дың «Йыйын»ына рәхим итегеҙ, дуҫтар!