Кисә, 8 апрелдә, Башҡорт дәүләт академия опера һәм балет театры Мәскәүҙәге Рәсәй Дәүләт академия Ҙур театры сәхнәһендә «Рахманинов. Ғүмер оҙонлоғондағы симфония» балетын ҡуйҙы. Спектаклде Башҡортостан Башлығы Радий Хәбиров та ҡараны.

Башҡорт опера һәм балет театры Ҙур театр сәхнәһен дүртенсегә яуланы. Алдағы йылдарҙа «Аттила», «Садко» һәм «Дон Кихот» операларын тәҡдим иткәйне.

Республика башлығы Радий Хәбиров сәфәрҙең тарихи әһәмиәтен билдәләне.

«Ҙур театрҙың тарихи сәхнәһендә сығыш яһау – һәр артистың хыялы, һәм был беҙҙең өсөн мөһим ваҡиға. Труппабыҙҙың быға тиклем 1955 йылда Мәскәүҙә Башҡорт әҙәбиәте һәм сәнғәте декадаһы барышында сығыш яһауын иҫәпкә алғанда, был гастроль бигерәк тә ҙур мәғәнәгә эйә, – тип билдәләне Радий Хәбиров. – Йыл һайын Мәскәү тамашасыларына яңы спектаклдәр алып килергә һәм ижади уңыштар менән уртаҡлашырға теләйбеҙ».

Радий Хәбиров шулай уҡ, Рудольф Нуриев исемендәге Башҡорт хореография колледжы студенттарының спектаклдә ҡатнашыуын билдәләп, йәш таланттарға ярҙам итеүҙең мөһимлеген һыҙыҡ өҫтөнә алды.

«Рахманинов. Ғүмер оҙонлоғондағы симфония» балеты тамашасыларҙа ҙур ҡыҙыҡһыныу уятты, улар араһында федераль власть органдары вәкилдәре, мәҙәниәт һәм сәнғәт эшмәкәрҙәре, шулай уҡ Мәскәү халҡы була. Шуныһы мөһим, спектакль дүрт йүнәлеш буйынса «Алтын битлек» Рәсәй милли театр премияһына тәҡдим ителгән.

18 апрелдә Ҙур театр сәхнәһендә Башҡорт опера һәм балет театрының йәнә бер спектакле – «Ай тотолған төндә» операһы була. Был башҡорт театр сәнғәтенең юғары оҫталыҡ кимәле һәм абруйы хаҡында һөйләй.

Спектаклдән һуң Радий Хәбиров театр коллективына хеҙмәте өсөн рәхмәт белдерҙе һәм «Башҡортостан дуҫтарын йыя» проектының мөһимлеген һыҙыҡ өҫтөнә алып, артабанғы хеҙмәттәшлеккә әҙер булыуын белдерҙе.