Башҡорт дәүләт опера һәм балет театрының балет труппаһы Силәбелә 23 июндән 1 июлгә тиклем үтәсәк «Екатерина Максимова хөрмәтенә» халыҡ-ара балет фестивалендә ҡатнаша.

М.И. Глинка исемендәге Силәбе опера һәм балет театры сәхнәһендә Силәбе, Өфө, Екатеринбург һәм Красноярск артистары сығыш яһай. Фестивалдең афишаһында премьералар һәм театрҙарҙың репертуарында күптән нығынған спектаклдәр урын алған.

Башҡорт дәүләт опера һәм балет театры быйыл форумдың ижади программаһына Родион Щедрин музыкаһына «Конёк-Горбунок» балет-феерияһы менән инде.

Иҫегеҙгә төшөрәбеҙ, иртәгә, 16 июндә, Башҡорт дәүләт опера һәм балет театрында башҡорт халҡының милли батыры Салауат Юлаевҡа арналған концерт уҙасаҡ.