Уҙған йыл аҙағында Башҡорт дәүләт опера һәм балет театрында бағыусыларҙың ярҙамы менән бөтә донъяға билдәле Steinway&Sons Америка компанияһының рояле барлыҡҡа килде.

Steinway&Sons роялдәре музыкаль донъяла Страдивари скрипкаһы аналогы булған. Уйын ҡоралын көйләү өсөн Өфөгә Steinway&Sons компанияһының Рәсәйҙәге вәкиллегенең техник хеҙмәте директоры Владимир Спесивцев килде.

Театр тамашасылары тәүге тапҡыр 4 майҙа яңы роялде ишетәсәк. Асҡар Абдразаҡов менән ижади дуэтта заманса фортепиано сәнғәтенең күренекле вәкиле Николай Луганский башҡарыуында рус композиторҙарының әҫәрҙәре яңғырар.

Кисәнең икенсе бүлексәһендә Николай Луганский театрҙың симфоник оркестры менән бергә Сергей Рахманиновтың оркестр менән фортепиано өсөн Икенсе концертын башҡара. Дирижеры - Артём Макаров.