30 ғинуарҙа Башҡорт дәүләт ҡурсаҡ театрында (Октябрь проспекты, 158) реконструкция алдынан аҙаҡҡы тапҡыр «Билдәле Незнайка» һәм «Бәхетле өйрәк» спектаклдәре ҡуйыласаҡ.

Был хаҡта учреждениеның матбуғат хеҙмәтендә хәбәр иттеләр. Марттан алып ҡурсаҡ театры спектаклдәрен тамашасылар Башҡорт дәүләт опера һәм балет театрының бәләкәй залында һәм Өфө балалар филармонияһы сәхнәһендә ҡарай аласаҡ.

Театрҙың яңы проекты бинаны яңыртыуҙы, уға төкәтмә төҙөүҙе, шулай уҡ биләмәне төҙөкләндереүҙе күҙ уңында тота. Реконструкциянан һуң ҡурсаҡ театрында 135 урынлыҡ бәләкәй тамаша залы, 40 урынлыҡ балалар кафеһы, музей, уйын бүлмәһе, балалар һәм уйын ижади студиялары барлыҡҡа киләсәк.

Тергеҙеү эштәрен 2024 йылға тамамлау күҙаллана.