Башҡорт режиссеры Булат Йосоповтың "Бабич" һәм "Беренсе Республика" фильмдары ФЕСТПРО халыҡ-ара кинофестивалендә еңеү яуланы. Фестиваль 13 майҙан 19-на тиклем Мәскәү, Санкт-Петербург, Пенза һәм Владимир ҡалаларында үткән. "Бабич" кинотаҫмаһы "Иң яҡшы тулы метражлы фильм" номинацияһында иң көслөһө тип табылған.
Бынан тыш, төп ролде башҡарыусы Илгиз Таһиров "Иң яҡшы ирҙәр роле", Алһыу Тимеркәева "Костюмдар буйынса иң яҡшы рәссам эше" номинацияларында еңгән. "Беренсе Республика" фильмы "Иң яҡшы сценарий" һәм "Иң яҡшы ҡуйыусы рәссам" номинацияларында юғары баһа алған. Кинофестивалгә донъяның 60 иленән 568 заявка ҡабул ителгән булған.