Бөгөн Сибайҙа «Ирәндек моңдары» тѳбәк-ара башҡорт халыҡ йырҙарын башҡарыусылар конкурсы башлана. Конкурста 35 йәшкә тиклемге үҙешмәкәр һәм профессиональ башҡарыусылар ҡатнаша. конкурстың маҡсаты - халыҡтың башҡарыу традицияларын һаҡлау, башҡорт фольклорын үҫтереү, республиканан ситтә йәшәүсе башҡорттар менән төбәк-ара мәҙәни бәйләнештәрҙе үҫтереү. Көс һынашыусылар башҡарылған әҫәрҙәрҙең тарихын белергә тейеш, һирәк яңғыраған фольклор өлгөләре хуплана. Төбәк-ара бәйге барышында ғалим-фольклорсылар һәм билдәле халыҡ йырсылары менән осрашыуҙар, башҡорт вокалы буйынса ижади лаборатория ҡаралған.

Бынан теүәл 20 йыл элек, йәғни 1996 йылдың 15-18 майында тәүге тапҡыр «Ирәндек моңдары» бәйгеһе ойошторола. Шул мәлдән башҡорт халыҡ йырҙарын башҡарыусыларҙың төбәк-ара конкурсы күркәм традицияға әүерелеп, Сибай ҡалаһы иң һәләтле, моңло, дәртле балалар һәм йәштәрҙе йыйыр төбәккә әйләнде. Быйыл был йыр-моң бәйгеһе 13-сө тапҡыр ойоштороласаҡ.
«Ирәндек моңдары» кеүек оло бәйгенең тап Сибайҙа үткәрелеүе юҡҡа түгел. Уның башҡорт милләтенең төп этник өлөшө йәшәгән, халҡыбыҙҙың йыр-моңдарының иң гүзәл өлгөлөре һаҡланған, мәшһүр йырсылары менән дан тотҡан ерлектә уҙғарылыуы тәбиғи ҙә, дөрөҫ тә. Тәүҙә, йәғни 1996 йылдан 2000 йылға тиклем йыл һайын үткәрелеп, унан ике йылға бер ойошторолоп килгән конкурс бик күптәргә ҡанат ҡуйҙы. Беренсе йылдарҙа үҙешмәкәрҙәр араһында сығыш яһап, бер нисә йылдан профессионалдар араһында үҙ көсөн, һәләтен һынап ҡараусыларҙың күп булыуы ла быға асыҡ дәлил. Балалар араһында ҡатнашыуҙан башлап, үҫә барып, аҙаҡ Гран-при алыусылар ҙа бар. Был үҙе үк күпте һөйләй. Тәүге йылдарҙа конкурсанттар һаны 90-ға ла тулмаһа, аҙаҡ ул 100-ҙән ашты. Ҡыҫҡаһы, бәйгенең абруйы күтәрелгәндән-күтәрелә бара. Быйыл да конкурстың юғары кимәлдә үтәсәгенә һәм яңы таланттарға киләсәккә ышаныслы юл һаласағына өмөт ҙур.