Чебоксар ҡалаһында үткән «Ясна Музыка» беренсе Волга буйы йәштәр этномузыка фестивале киң ҡолас ала. Ижади ярышта Башҡортостандан йырсы Зилиә Бәхтиева, ҡурайсы Юлай Ҡасимов, йәш йыраусы Мирас Үҙәнбаев, «Хазина» этно-проекты, «Торатау» этно-ансамбле, «Ятаған» һәм «Йәнгүзәл» этно-төркөмдәре ҡатнаша. Проект Президенттың мәҙәни башланғыстар фонды ярҙамында тормошҡа ашырыла.

Конкурс яңы исемдәр асыуға, милли музыка традицияларына нигеҙләнеп ижад иткән һәм халыҡ уйын ҡоралдарын заманса аранжировкаларҙа ҡулланған йәш башҡарыусыларҙы үҫтереүгә йүнәлтелгән.

Конкурста Волга буйы федераль округынан 18-35 йәшлек яңғыҙ башҡарыусы йәки ҡатнашыусылары биштән күп булмаған төркөмдәр, ижади йәштәр, профессиональ һәм үҙешмәкәр артистар, музыкаль коллективтар ҡатнаша.

Этнофестивалдең төп шарты – мили телдә һәм/йәки боронғо музыка ҡоралдарын файҙаланып, яңы заманса яңғырашта, яңы аранжировкаларҙа һәм формаларҙа йырҙар башҡарыу. Һәр номинант бер әҫәр тәҡдим итергә тейеш.

Конкурс 2022 йылдың 1 ноябрендә башланды. Әлеге көндә тауыш биреү бара.

Этноконкурстың финалы 2023 йылдың 3-4 майында уҙасаҡ. "«Ясна Музыка» беренсе Волга буйы йәштәр этнофестиваленең гала-концертында 10 финалсы сығыш яһаясаҡ, жюри уларҙан өс лауреатты - иң яҡшы төркөмдәрҙе йәки башҡарыусыларҙы һайлай.

Яҡташтарыбыҙға тауыш биреү өсөн ошо һылтанма буынса күсергә кәрәк https://yasnamusic.ru/%d1%83%d1%87%d0%b0%d1%81%d1%82%d0%bd%d0%b8%d0%ba%d0%b8/ .