Башҡортостан дәүләт академия симфоник оркестры ҡышҡы гастроль барышында республика халҡына ысын Яңы йыл әкиәте бүләк итә. Петр Чайковскийҙың “Щелкунчик” әҫәре Бөрөлә, Өфөлә, Стәрлетамаҡта һәм Салауатта яңғыраны, күрше төбәктәге Магнитогорск ҡалаһы ла ситтә ҡалманы.

Бар донъяға билдәле музыкаль әҫәр Яңы йыл һәм Раштыуа байрамдарын хәтерләтә. Бөгөн ул Сибайҙа яңғырай, ә артабан Дмитрий Крюков етәкселегендәге дәүләт оркестры Белорет, Дүртөйлө һәм Дәүләкән ҡалаларында уйнаясаҡ.

Концерттар аншлаг менән уҙа, ә коллективтың республика буйынса традицион гастролде Башҡортостандың бәләкәй ҡалаларында йәшәүселәргә юғары музыка сәнғәте менән яҡындан танышыу мөмкинлеген бирә. Мәскәү, Санкт-Петербург ҡалаларының талапсан тамашасылары һөйөүен һәм ихтирамын яулаған оркестр ҙур булмаған сәхнәләрҙә лә ихлас сығыш яһай, яҡташтарыбыҙға көйҙәр менән бергә йөрәк йылыһын да еткерә.

– Ошо яңы йыл осоронда беҙҙең концерт турына ингән бөтә ҡалаларға ла тап “Щелкунчик”ты алып барырға теләгәйнем. Симфоник концерттарға йыш йөрөмәгән кешеләрҙә был әҫәр ысын һоҡланыу уята. Тулы залдар һәм иң йылы алҡыштар – классик музыка концерттарын яратыуҙарына һәм баһалауҙарына төп дәлил. Тимәк, киләһе гастроль мәлендә тыңлаусыларыбыҙ тағы ла күберәк буласаҡ! – тине Башҡортостан Республикаһы дәүләт академия симфоник оркестрының генераль директоры, Башҡортостандың халыҡ артисы Артур Нәзиуллин.

Фото: Башҡортостан дәүләт академия симфоник оркестрының матбуғат хеҙмәте.