«Кино фонды» кинотеатрҙарға ярҙам күрһәтеү буйынса яңы конкурс иғлан итте, уның барышында бер миллиард һум күләмендә аҡса бүлеү ҡаралған. Бынан алдағы конкурстарҙағы кеүек үк, һәр кинозалға 5 миллион һумға тиклемге күләмдә аҡса бирелә. Ул кире ҡайтарылмай. Ҡайтанан йыһазландырылған кинозал өсөн төп шарт — кварталына 50 проценттан кәм булмаған күләмдә илебеҙҙә төшөрөлгән фильмдар күрһәтеү. Ғаризалар 31 июлдән 25 авгусҡа тиклем ҡабул ителә.

2015-2016 йылдарҙа Кино фонды кинотеатрҙарҙы яңыртыуға һәм һанлы ҡорамалдар менән йыһазландырыуға өс тапҡыр аҡса бүлде.

Уҙған өс конкурстың йомғаҡтары буйынса Башҡортостанда 14 кинозалды яңыртыуға 70 миллион һум самаһы йүнәлтелде. Тағы өс кинозалда реконструкциялау буйынса эштәр алып барыла, тип хәбәр итә төбәктең Мәҙәниәт министрлығы.

Кинотеатрҙарға булышлыҡ итеү федераль программаһы илдә кино күрһәтеү географияһын киңәйтеүгә йүнәлтелгән. Программаның төп маҡсаты — кинотеатрҙарҙа фильмдар ҡарау мөмкинлеге булмаған тораҡ пункттарҙа яңы кинозалдар булдырыуҙа ярҙам итеү.

Сығанаҡ: http://www.bashinform.ru/bash/1027177/