Алдан хәбәр итеүебеҙсә, Яҙыусылар союзы балалар һәм үҫмерҙәр өсөн проза әҫәрҙәренә конкурс иғлан иткәйне. Иҫегеҙгә төшөрәбеҙ, был бәйге билдәле яҙыусы һәм шағирә Гүзәл Ситдиҡованың ярҙамы менән башланғыс алғайны. Үҙе лайыҡ булған Һәҙиә Дәүләтшина исемендәге дәүләт премияһы өсөн тапшырылған 100 мең һумды ул тулыһынса ошо изге маҡсатҡа йүнәлтте.
Конкурс ағымдағы йылдың 1 февраленә тиклем дауам итте. Унда ҡатнашыусылар өсөн йәш буйынса бер ниндәй сикләү ҙә юҡ ине, йәғни яңы ҡулына ҡәләм алған үҫмер ҙә, ил ағаһы менән ил инәһе лә берҙәй ҡатнаша алды.
Ошо көндәрҙә генә "ҺӘҘИӘ" тип аталған үҫмерҙәр өсөн күләмле проза әҫәрҙәр конкурсына йомғаҡ яһалды. Конкурста танылған яҙыусылар менән бер рәттән әлегәсә исемдәре күренмәгән авторҙар ҙа ҡатнашты.
Еңеүселәр 27 мартта Бөрө ҡалаһындаүткәреләсәк яҙыусыға арналған ғилми-ғәмәли конференцияла тапшырыласаҡ.