2 декабрҙә Х. Әхмәтов исемендәге Башҡорт дәүләт филармонияһының Бәләкәй залында “Аманат” башҡорт халыҡ музыка ҡоралдарында (думбыра, ҡыл-ҡумыҙ) уйнаусыларҙың I республика бәйгеһе үтә. Конкурс күренекле композитор Заһир Исмәғилевтың 100 йыллығына арнала.

Бәйгене ойоштороусылар: БР Мәҙәниәт министрлығы, Х.Әхмәтов исемендәге Башҡорт дәүләт филармонияһы, З. Исмәғилев исемендәге Өфө дәүләт сәнғәт институты.

Конкурс шарттары буйынса бәйгелә музыка, сәнғәт балалар мәктәптәре, ижади йорттарҙа, дөйөм белем биреү усаҡтарының түңәрәктәрендә шөғөлләнеүсе балалар, урта һәм юғары белем биреү уҡыу йорттарының студенттары ҡатнаша.

Билдәле һәм күренекле музыкаль фольклористика һәм халыҡ музыкаһы белгестәренән торған жюри ағзалары: З. Исмәғилев исемендәге Өфө дәүләт сәнғәт институтының халыҡ инструменттары кафедраһы профессоры Зифа Сәфәрғәлина (думбыра), З.Исмәғилев исемендәге ӨДСИ-ның доценты Рафаэль Вәлиев (ҡыл-ҡубыҙ), ошо уҡ уҡыу йортоноң уҡытыусылары Гүзәл Үмәрғәлина (думбыра), Эльвира Мөхәметдинова (ҡыл-ҡубыҙ). Жюри рәйесе- З. Исмәғилев исемендәге ӨДСИ-ның доценты Сабир Әбхәлимов.

Конкурстың ойоштороу комитетына Х.Әхмәтов исемендәге Башҡорт дәүләт филармонияһы директоры, БР халыҡ артисы Айҙар Зөбәйҙуллин, оҫта ҡурайсы, Рәсәйҙең атҡаҙанған артисы, БР халыҡ артисы, С. Юлаев исемендәге Дәүләт премияһы лауреаты, ӨДСИ-ның башҡорт инструменттары факультетының деканы Азат Айытҡолов, ӨДСИ-ның традицион музыкаль башҡарыу кафедра мөдире Артур Ғайсаров.

Конкурстың һөҙөмтәләре ,2 декабрь көнө 19.00 сәғәттә, Х. Әхмәтов исемендәге Башҡорт дәүләт филармонияһында үтәсәк Гала-концертта билдәле буласаҡ. “Аманат” конкурсының дипломанттары һәм лауреаттары сығышына рәхим итегеҙ!

Түбәндәге һылтанма буйынса конкурс шарттары менән таныша алаһығыҙ : https://culture.bashkortostan.ru/documents/449336/