Ғафури районында атта һыбай килеш уҡ атыу һәм традицион уҡтан атыу буйынса "Уҡлыҡая уғатары" республика фестивале уҙҙы. Проект Башҡортостандың бренд саралары исемлегенә индерелгән. Фестивалдә ҡатнашыусыларҙы һәм ҡунаҡтарҙы Мәҙәниәт министры урынбаҫары Илнур Мөхйәнов, Ғафури районы хакимиәте башлығы Фәнзил Сыңғыҙов сәләмләне.

 - Ярыштар халыҡ-ара дисциплиналар һәм ҡағиҙәләр буйынса уҙҙы. Ир-егеттәр һәм ҡатын-ҡыҙҙар категорияһында алты комплект миҙал уйнатылды: 70 метрға Төркиәнең "Пута" һы, 35-40 метрға Урта Азия (ҡырғыҙ) сәпе, 30 метрға ҡаҙаҡтарҙың "Джамбы" сәпе, шулай уҡ Венгрия маршрутынан һәм Кореяның ике, өс диңгеҙ маршрутынан торған һыбай килеш атыуҙа ике комплект миҙал. Был дисциплиналар Бөтә донъя күсмә халыҡтар уйындары программаһына инә һәм улар буйынса халыҡ-ара ярыштар үткәрелә, - тип билдәләне «Мәргән уҡсы»  ойошмаһы етәксеһе Юлай Ғәлиуллин.

Фестивалгә Әбйәлил, Баймаҡ, Бөрйән, Белорет, Дәүләкән, Ғафури, Ишембай, Ейәнсура, Өфө, Учалы райондарынан, Өфө һәм Сибай ҡалаларынан 70-тән ашыу уҡсы йыйылды. "Уҡлыҡая уғатары" фестивале 2024 йылдың көҙөндә Астанала уҙғарыласаҡ Күсмә халыҡтар уйындарына әҙерләнеүҙең башланғыс этабы булып тора.