Назар Нәжми – Хәбибназар Нәжметдин улы Нәжметдинов 1918 йылдың 5 февралендә Өфө губернаһы Бөрө өйәҙе Миңеште ауылында тыуған.

Ете йыллыҡ мәктәпте тамамлағас, Өфө металлургия рабфагында уҡый. 1938 йылда К. А. Тимирязев исемендәге Башҡорт дәүләт педагогия институты уҡырға инә. Өсөнсө курстан, 1941 йылда, Бөйөк Ватан һуғышына китә, 1946 йылда ғына әйләнеп ҡайта. Фронтта күрһәткән батырлыҡтары өсөн ике тапҡыр II дәрәжә Ватан һуғышы, Ҡыҙыл Йондоҙ ордендары һәм миҙалдар менән наградлана.

Ҡайтҡас, уҡыуын дауам итә: 1947 йылда институттың тел һәм әҙәбиәт факультетын тамамлай.

Назар Нәжми 1947—1949 йылдарҙа «Совет Башҡортостаны» гәзите, «Әҙәби Башҡортостан» журналы редакцияларында эшләй. 1955—1959 йылдарҙа ул — «Һәнәк» журналының баш мөхәррире, 1962—1969 йылдарҙа — Башҡортостан Яҙыусылар союзы идараһы рәйесе.

Башҡорт әҙәбиәтен үҫтереүҙә күрһәткән хеҙмәттәре өсөн Октябрь Революцияһы ордены, ике тапҡыр Хеҙмәт Ҡыҙыл Байрак ордены менән наградлана. Башҡорт АССР-ы Юғары Советы депутаты итеп һайлана. РСФСР дәүләт премияһы һәм республиканың Салауат Юлаев исемендәге дәүләт премияһы (1972) лауреаты. 1993 йылда уға Башҡортостандың халыҡ шағиры исеме бирелде.

Әҙиптең шиғырҙарына яҙылған йырҙар әлеге көндә лә йырсылар һәм халыҡ тарафынан яратып башҡарыла. "Ҡайтманығыҙ тыуған ерҙәргә", "Батырҙар йыры" (Заһир Исмәғилев көйө), "Дуҫлыҡ, дуҫлыҡ" (Хөсәйен Әхмәтов көйө), "Ҡара муйыл сәскәһендәй" (Нур Дауытов көйө), "Өфө йүкәләре", "Юҡҡа түгел, юҡҡа түгелдер" (Рим Хәсәнов көйө), "Ағиҙелдә аҡ томан" (Нариман Сабитов көйө) һәм башҡа бик күп йырҙары тамашасы күңеленә айырыуса үтеп инә.