Кисә, 16 апрелдә, Башҡортостан Республикаһының мәҙәниәт министры Әминә Шафиҡова мәҙәниәт һәм сәнғәт эшмәкәрҙәре менән осрашып, тармаҡтың тарихи хәҡиҡәтте һаҡлауҙағы роле тураһында фекер алышты.

Осрашыу Башҡортостан Республикаһының Милли музейында үтте, унда кисә шулай уҡ Мәскәүҙән реставрациянан һуң алып ҡайтылған 112-се Башҡорт кавалерия дивизияһының байрағы менән таныштырыу сараһы үтте.

«Геройҙарыбыҙ тураһында үҙебеҙ һөйләмәһәк, кем һөйләһен? Шуға күрә коллегалар «Еңеү йырҙары» флешмобын башлап ебәрергә тәҡдим итте. Һәр кем һуғыш йылдарында ижад ителгән яратҡан йырын башҡарып, видены социаль селтәргә һала ала», – тип иғлан итте министр.

Был тәҡдимде осрашыуҙа ҡатнашыусылар дәррәү хупланы һәм бергәләп Заһир Исмәғилевтең Ҡадир Даян һүҙҙәренә ижад ителгән «Шайморатов генерал» йырын башҡарҙы.

Бөйөк Еңеүҙең 80 йыллығына арналған флешмобта ҡатнашыуға республиканың бөтә халҡы саҡырыла. Бының өсөн яратҡан хәрби йырҙың куплетын видеоға яҙҙырырға һәм социаль селтәрҙәрҙә #ПесниПобеды хештегы менән уртаҡлашырға кәрәк.