Ҡаҙағстанда ойошторолған "Бейеү рухы" Халыҡ-ара фестивале ун дүрт ил артистарын берләштерҙе, күләмле мәҙәни сарала Башҡортостан данын "Guzal-dance" ансамбле солисы Регина Әһелова яҡланы.

Һайлап алыу турҙарын уңышлы үткән яҡташыбыҙ "Заһиҙа" бейеүен башҡарып, сит ил вәкилдәрен хайран ҡалдырҙы. Ҡурай моңдарына оҫта баҫып ул, башҡорт ҡатын-ҡыҙының уңғанлығын, матурлығын күрһәтте. Сараны ойоштороусылар сәхнәлә заманса этник музыканы һәм донъя халыҡтары мәҙәниәтен еткереү маҡсатын ҡуя.

Регина Әһелова әйтеүенсә, "Заһиҙә" бейеүен ихлас ҡабул иткәндәр. Алҡыштар башҡорт бейеүенең көсөн күрһәтә ти, ул.

Яҡташтарыбыҙ Астанала яулыҡ бейеүен дә күрһәтә. Был үҙенә күрә милли кейемдәрҙә импровизация була. Төрлө музыка ҡоралдарынан моң ағыла, көйҙәр яңғырай, башҡорт коллективының сығышын сираттағы тапҡыр алҡыштарға күмәләр.