Бөрйән районында билдәле драматург, яҙыусы, журналист, Рәсәйҙең һәм Башҡортостандың Яҙыусылар союзы ағзаһы Сөләймән Йәнғәли улы Латыповтың 65 йәшлек юбилейына арналған ижад кисәһе үтте.

Юбилярҙы Бөрйән районы хакимиәте башлығы Рөстәм Шәрипов, Матбуғат һәм киң мәғлүмәт саралары агентлығы етәксеһе Борис Мелкоедов, “Башҡортостан Республикаһы” Нәшриәт йорто етәксеһе Венера Хакимова, “Аманат” журналының баш мөхәррире Сәлмән Ярмуллин , Башҡортостан Яҙыусылар союзы рәйесе урынбаҫары Рәшит Зәйнуллин, яҙыусы һәм дәүләт эшмәкәре Рафаил Зинуров, туғандары һәм башҡа саҡырылған ҡунаҡтар тәбрикләне.

Рөстәм Динислам улы юбилярға ҡамсат бүрек менән елән кейҙерҙе һәм ҡотлау һүҙҙәрен еткерҙе. “Артабан да Америка тиклем Америкаларҙы көнләштереп, халҡыбыҙға лайыҡлы хеҙмәт итегеҙ, әҙәбиәтебеҙҙең һәм театр сәнғәтенең бәҫен арттырығыҙ”, - тине үҙ сығышында Рәшит Зәйнуллин Яҙыусылар союзының Почет грамотаһын һәм бүләген тапшырып.

Райондың танылған йырсыларын ҡунаҡтар моңланып тыңлаһа, юбилярҙың пьесалары буйынса урындағы халыҡ театрҙары ҡуйған тамашаларҙы алҡышлап оҙатты.