Быйыл Башҡортостанда Гастролдәр үҙәге булдырыласаҡ. Ул Башҡорт дәүләт филармонияһы ҡарамағында эшләйәсәк. Был хаҡта мәҙәниәт министры Әминә Шафиҡова республика Мәҙәниәт министрлығы коллегияһының киңәйтелгән ултырышында белдерҙе.

«Былтыр филармония эшкә әүҙем ҡушылды. Филармония ҡарамағындағы концерт программалары дирекцияһы Гастролдәр үҙәген булдырыу буйынса ҡарар проектын әҙерләгән. Киләсәктә дәүләт учреждениеларының гастролдәр эшмәкәрлеген тәртипкә килтереү буйынса маршрут биттәре буласаҡ. Ҡайҙа ниндәй концерт, кисә уҙғарыуҙарын, ниндәй төркөм сығыш яһауын күреү өсөн бөтә республиканы йәлеп итергә теләйбеҙ», — тип хәбәр итте министр.
Шулай уҡ быйыл “Берҙәм электрон билет” хеҙмәтен һәм виртуаль концерт залы проектын тормошҡа ашырыу планлаштырыла. Бындай комплекс республика халҡына Өфөлә барған сағыу мәҙәни тамашаларҙы он-лайн тәртибендә күҙәтеп барырға мөмкинлек бирә, шулай уҡ концерттар яҙмалары телеканалдар аша күрһәтеләсәк.

Фотогалереяға күсергә...