Яҙыусы, тәржемәсе, журналист, Башҡортостандың атҡаҙанған мәҙәниәт хеҙмәткәре Сабир Шәриповтың исеме төрки телле халыҡтар әҙәбиәтендә киң билдәле. Яҙыусының халыҡсан, һутлы тел менән яҙылған әҫәрҙәрен төрлө быуын уҡыусылары яратып уҡый. Сабир Нәғим улы тиҫтәнән ашыу китап авторы, әммә уның тормош юлы күберәк матбуғат баҫмалары менән бәйле.

Белорет районының Баҡый ауылында тыуып үҫкән егет Белорет педагогия училищеһын тамамлағандан һуң тыуған мәкәтбендә белем бирә, әммә ике йылдан һуң белем алыу теләге уны Башҡорт дәүләт университетына алып килә. Студент йылдарында уҡ Сабир Шәрипов тәүге ижад емештәрен баҫтыра башлай. Диплом алғас тәүҙә "Совет Башҡортостаны", һуңынан "Китап" нәшриәтендә, "Ағиҙел" журналында эшләй. Әммә бер ваҡытта ла әҙәбиәттән айырылмай. Сабир Шәриповтың әҫәрҙәре рус, украин, татар, сыуаш телдәренә тәржемә ителгән.

Әҙәбиәттә ул халыҡтың тормош-көнкүрешен бик тәфсирләп яҡтыртҡан әҫәрҙәре менән киң билдәлелек һәм хөрмәт яуланы. Башҡорт халҡы, әҙәбиәте күпме йәшәһә, Сабир Шәриповтың романдары, повестары, хикәйәләре һәм новеллалары шунса беҙҙең хәтеребеҙҙә һаҡланасаҡ.