Бөгөн Ҡырғыҙстанда башҡорт теленә тәржемә ителгән «Манас» ҡырғыҙ эпосы менән таныштырыу үтте. «Манас» ЮНЕСКО-ның кешелектең мәҙәни мираҫы ҡомартҡыһы исемлегенә һәм донъяла иң күләмле эпос булараҡ Гиннес рекордтар китабына индерелгән.

Башҡортсаға тәржемә ителгән «Манас» эпосының тәүге китабын 2017 йылдың июнендә Башҡортостан Башлығы Рөстәм Хәмитов Ҡырғыҙстан Президенты Алмазбәк Атамбаевҡа бүләк итте.

Сара Жосоп Баласағы исемендәге Ҡырғыҙ милли университетында «Алтай цивилизацияһы һәм алтай теле туғандаш халыҡтары» халыҡ-ара форумы барышында үтте. Тантанала танылған ғалимдар, юғары уҡыу йорто етәкселеге ҡатнашты.

– Башҡортостан һәм Ҡырғыҙстан халыҡтарын рухи бәйләнеш нығыта. Беҙ ата-бабаларҙың аманатын онотмайбыҙ, милли әкиәттәрҙе, эпостарҙы, йолаларҙы тоғро һаҡлайбыҙ. «Манас» эпосы  – халыҡтарҙың ҡаҙанышы. Шуныһы ҡыуаныслы, ҡобайырҙы башҡорт теленә тәржемә итеү ҡырғыҙ халҡының алтын ҡомартҡыһы менән төбәктә йәшәүселәргә лә танышырға мөмкинлек бирә, – тип белдерҙе Башҡортостан Республикаһы Хөкүмәте Премьер-министры урынбаҫары Салауат Сәғитов. – Яҡын арала ҡырғыҙ теленә башҡорт халҡының «Урал батыр» эпосын тәржемә итеү буйынса эштәр тамамланасаҡ. Был ваҡиғаға беҙ бик шатбыҙ.

«Манас» эпосын Өфө ғилми үҙәге Тарих, тел һәм әҙәбиәт институты блгестәре тәржемә итте. Эштәр 2015 йылда башланды.  Иҫегеҙгә төшөрәбеҙ, 2015 йылдың мартында Ҡырғыҙстанда Башҡортостан Фән һәм мәҙәниәт көндәре үтте. 

Сығанаҡ: Башҡортостан Хөкүмәтенең рәсми сайты