11 майҙа Башҡортостандың Милли симфоник оркестры йәнә Рәсәйҙең һәм донъяның иң танылған сәхнәләренең береһендә: П.И. Чайковский исемендәге концерт залында «Рәсәй оркестрҙары. Рус симфоник музыкаһы шедеврҙары» абоненты сиктәрендә күренекле пианистарҙың береһе – Рәсәйҙең атҡаҙанған артисы Екатерина Мечетина менән бергә сығыш яһай. Концерт Рәсәй Федерацияһы Мәҙәниәт министрлығының «Бөтә Рәсәй филармония миҙгелдәре» программаһы булышлығында уҙа.

БР Милли симфоник оркестрының баш дирижеры, Башҡортостандың атҡаҙанған артисы Дмитрий Крюков етәкселегендә Анатолий Лядовтың «Кикимора» симфоник картинаһы, Сергей Рахманиновтың оркестр менән фортепиано өсөн 2-се концерты һәм Игорь Стравинскийҙың «Изге яҙ» («Весна священная») балеты музыкаһы яңғыраясаҡ.

Оркестрҙың гастролдәре Ырымбурҙа дауам итә, унда Башҡортостандың ижади коллективы Рәсәйҙең халыҡ артисы Денис Мацуевтың саҡырыуы буйынса сығыш яһай. «Денис Мацуев: Быуындар диалогы» музыкаль фестивале «Денис Мацуевтың Ырымбур миҙгелдәре» XIII Бөтә Рәсәй академия сәнғәте фестивале сиктәрендә уҙа.

Сығыштар Ырымбур өлкәһе филармонияһының ҙур концерт залында уҙа. 12 майҙа Моцарт, Чайковский һәм Рахманиновтың әҫәрҙәре яңғырай. Уларҙы Башҡортостандың Дәүләт оркестры Денис Мацуев һәм халыҡ-ара конкурстар лауреаттары Полина Тхай (виолончель), Анна Савкина (скрипка) һәм Лилит Давтян (сопрано) менән бергә башҡара.

13 майҙа Паганини, Шостакович, Гершвин, Наварро, Әхмәтов кеүек төрлө дәүер композиторҙарының төрлө стилдәге әҫәрҙәре яңғырай. Концерт программаһында классика менән уның заманса яңғырашы үрелеп барасаҡ. Джаз ритмдары һәм интонациялары Урал далалары моңо менән бергә яңғыраясаҡ. Солистар булып Рәсәйҙең халыҡ артисы Денис Мацуев (фортепиано), Башҡортостандың халыҡ артисы Артур Нәзиуллин (кларнет), Рәсәйҙең атҡаҙанған артисы Андрей Иванов (контрабас), Александр Зингер (һуҡма) һәм Екатерина Мочалова (домра) сығыш яһай.

- Милли симфоник оркестр республиканы федераль кимәлдә юғары академик мәҙәниәтле төбәк булараҡ күрһәтеүен уңышлы дауам итә. Шуныһы мөһим: коллектив билдәләнгән темптарҙы кәметмәй һәм яңынан-яңы бейеклектәр яулай. Башҡортостан дәүләт оркестры - Рәсәйҙең төп концерт залдарының береһе – Пәтр Иванович Чайковский исемендәге концерт залының, шулай уҡ Илдар Абдразаҡова, Денис Мацуев, Сергей Ролдугин, Владимир Спиваков, Екатерина Мечетина кеүек  билдәле дирижер һәм музыканттарҙың көтөп алынған ижади партнеры, - тип билдәләй Башҡортостандың мәҙәниәт министры Әминә Шафиҡова.