“Башҡортостан” дәүләт концерт залы-күптәргә  “Нефтяник” мәҙәниәт йорто булараҡ таныш. Ә бөгөн меңәрләгән тамашасыларҙы йыя алған, яңы таланттар асыуға булышлыҡ иткән мәҙәниәт усаҡтарының береһенә әүерелде. Ысынлап та, был мәҙәни усаҡ- илһам һәм ижад йорто.

“Башҡортостан” дәүләт концерт залында бер-бер артлы мәҙәни-музыкаль саралар уҙа тора, зал һәр ваҡыт халыҡ менән шығырым тулы.

“Башҡортостан” дәүләт концерт залы бөгөнгө заман шарттарына тулыһынса яуап бирә. Тамаша залы рәттәр буйлап өҫтәмә үтеү юлдары менән амфитеатрҙы хәтерләтә. Түбә һәм стеналарҙың заманса йөҙлөгө акустикаһы яҡшыртылған. Симфоник һәм эстрада концерттар, төрлө шоу программалар уҙғарыу өсөн барлыҡ шарттар тыуҙырылған. Мәҙәни усаҡта эшләп килгән ижади коллективтарҙың эше һәр яҡтан маҡтауға лайыҡ.  Йәш быуынды сәнғәткә яҡынайтыу, улар тарафынан сәхнә серҙәренә төшөндөрөү маҡсатынан бик күп эштәр башҡарыла.

Әлеге көндә “Башҡортостан” дәүләт концерт залы симфоник, шулай уҡ эстрада концерттары, театр постановкалары һәм шоу-программалар уҙғарыу өсөн үҙенсәлекле концерт майҙансығы, тип билдәләне «Башҡортостан» дәүләт концерт залы директоры Алмас Сәйетов.         

Байрам концертында башҡорт һәм татар эстрадаһының билдәле сәхнә йондоҙҙары Айҙар Ғәлимов, Нәзифә Ҡадирова һәм Ғәли Алтынбаев, Дамира Сәйетова, Диана Ишниязова сығыш яһаны. РФ-ның атҡаҙанған артистары, юмор оҫталары  Валентина Коркина һәм Виктор Остроухов сығышы барыһының да күңеленә хуш килде. Шулай уҡ мәҙәниәт усағы эргәһендә әүҙем эшләп килгән театр коллективтары, бейеү ансамблдәренең сығыштары алҡыштарға күмелде.

Гүзәл Багаева