Бөгөн “Родина” кинотеатрында Ганс Христиан Андерсендың әкиәтенә таянып ижад ителгән «Тайна Снежной королевы» фильмының премьераһы үтте. Премьера тантаһын Башҡортостан Республикаһының Мәҙәниәт министры урынбаҫары Шамил Абдраҡов асты: “Мәғлүм булыуынса, ағымдағы йыл Кино йылы, тип иғлан ителгәйне. Кино йылы айҡанлы күп кенә саралар шәлкеме ойошторолдо. Маҡсатыбыҙға - илдә кинематографияны үҫтереүгә йәмәғәтселек иғтибарын йәлеп итеүгә өлгәшәбеҙ төҫлө.Мәскәүҙә төшөрөлгән “Тайна Снежной королевы” фильм-әкиәте барыбыҙға ла оҡшар, тигән теләктә ҡалам. Бөгөнгө кинофильды ҡарарға килгән йәштәрҙең, балаларҙың күп булыуы ҡыуаныслы күренеш. Шуға күрә бөгөн тәрбиәүи яҡтан әһәмиәтле, рухи ҡиммәттәрҙе пропагандалаған фильмдар төшөрөлөргә һәм күрһәтелергә тейеш. Сөнки кино, бигерәк тә йәш быуындың үҙаңын үҫтереүҙә мөһим урынды биләй”. Өфө тамашасыларына билдәле актриса, кинорежиссер, сценарист, РСФСР-ҙың атҡаҙанған артисы, Рәсәй Федерацияһының атҡаҙанған сәнғәт эшмәкәре Наталья Бондарчук “Тайна Снежной королевы” фильмын тәҡдим итте. Фильмдың премьераһы Башҡортостан Республикаһы Хөкүмәте һәм Мәҙәниәт министрлығы булышлығы ярҙамында уҙҙы. СССР-ҙың халыҡ артистары, режиссер Сергей Бондарчук һәм актриса Инна Макарованың ҡыҙҙары Наталья Сергеевна киң мәғлүмәт саралары хеҙмәткәрҙәре менән осрашыу ойошторҙо. Кинотаҫма төшөрөү процесы менән таныштырҙы, тамашасылар һорауына яуаптар ҡайтарҙы. Фильм режиссеры Наталья Бондарчук кино һөйөүселәр менән ҡыҙыҡлы әңгәмә ҡороп, йәш тамашасылар менән тура бәйләнешкә инде, ысынында, йәнле һөйләшеү барлыҡҡа килде. Фильмға билдәле рәсәй актерҙары йәлеп ителгән : Анна Снаткина, Анна Потебня, Влад Новицкий, Инна Макарова, Анна Ардова, Наталья Бондарчук, Дмитрий Харатьян. Андерсен ролендә австрия актеры Карл Маркович уйнай. Мастер Кис Коллеа (кино һөйөүселәргә «Пираты Карибского моря» фильмы аша таныш) 3D-технологиялар ҡулланып иҫ киткес фильм барлыҡҡа китергән. Космос системаһы, офоҡтағы төньяҡ балҡыш һәм ҡар бөртөктәре- барыһы ла оҫтаның хеҙмәт һөҙөмтәләре. Фильм Ямал, Австрия, Германия һәм Лапландия илдәрендә төшөрөлә. Йәш тамашасылар төньяҡ тәбиғәт ландшафтын, болан һәм эттәрҙән теҙелгән поездар, әкиәт урманына сәйәхәт итә ала. Фильм таҫмаһына иҫ киткес матур Альп күлдәре, Германиялағы королдәр һарайы төшөрөлгән..Телгә килгән әкиәт персонаждары-боландар, ҡарғалар-барыһы ла бала күңелендә хис-тойғолар тыуҙыра, тәьҫирле кинотаҫма һәр баланы әкиәт иленә сәйәхәткә саҡыра. Гүзәл Багаева