Бибисара әбей улы һәм килене менән ауылда донъя көтә, йәше өлкән булһа ла ҡул ҡаушырып ултырмай: әле картуф утай, әле мунса яға, әле гәзит уҡый… Күпме ғүмер ҡәйнә менән йәшәп килене унан арып та киткән, ә икенсе яҡтан, йорттағы бөтә эште шул әбейүшкә бөтөрөп йөрөй бит, һис артыҡ түгел… Улы менән килене, ҡалала йәшәгән ҡыҙы менән кейәүе әсәләрен «һин ҡара», «юҡ, һин ҡара» тип бәхәсләшкәндә, өлгөр замана ҡарсығы үҙ яҙмышын үҙе хәл итеп тә ҡуя. Ә нисек? Быға һис кемдең башы етмәҫ! 

 

«Әгәр сәхнәгә сығып, тамашасының йөрәген урынынан ҡуҙғата алһам, уны уйланырға мәжбүр итһәм – мин бәхетле…» - ти Актриса. Миңзәлә Хәйруллина ижадының төп үҙенсәлеге – халыҡсанлыҡ. Ҡайһы жанрҙа эшләмәһен, ниндәй ролдәр уйнамаһын, уның героинялары көндәлек тормошта, беҙҙең арала йыш осрай торған ҡатын-ҡыҙҙарҙы хәтерләтә һәм шуныһы менән дә тамашасы күңеленә уйылып ҡала.