Бөгөн Өфөлә студенттар араһында «КИНОFEST–2016» ҡыҫҡа метражлы кино фестивале асыла. Илдең һәр ҡайһы юғары уҡыу йорто студенты фильм төшөрә һәм юғары профессиональ жюри тарафынан баһаланасаҡ.

Фестиваль барышында режиссура, сценарий менән эшләү, төшөрөү һәм монтажлау, актерлыҡ оҫталығы буйынса оҫталыҡ дәрестәре үткәреү ҡаралған. Һуңынан әҙер эштәре булмаған ҡатнашыусылар алған белемдәрен фильм төшөргәндә ҡуллана ала.

Киләһе этапта студенттарҙың эштәрен ҡарарға, уларҙы башҡа тамашасылар менән тикшерергә һәм авторҙарға һорау бирергә мөмкин. Фестиваль 21 декабрҙә «Родина» кинотеатрында тамамлана. Унда бүләкләү тантанаһы була һәм иң яҡшы эштәр күрһәтелә.

«КИНОFEST–2016» фестивалендә ҡатнашырға теләүселәр 20 ноябргә тиклем ғариза бирергә тейеш. Тулыраҡ мәғлүмәт – «Бәйләнештә» социаль селтәрендәге төркөмдә.

«КИНОFEST» Башҡортостанда икенсе тапҡыр ойошторола. Сараның төп маҡсаты – студенттарҙа әүҙем ижади һәм тормош позицияһын тәрбиәләү, кино төшөрөү оҫталығын үҫтереү һәм тәжрибә туплау.