Ун дүртенсе тапҡыр ойошторолған сараның Гала концерты Еңеү паркында үтте. Бәйгелә үҙешмәкәр коллективтарҙан тыш, мәктәп уҡыусылары, урта махсус һәм юғары уҡыу йорттары студенттары ҡатнашты.
Жюри ағзалары уларҙың вокал оҫталығын ике йәш төркөмө буйынса - 13-17 һәм 18-30 йәштәгеләр араһында баһаланы. Конкурста ҡатнашырға теләк белдереп, йөҙгә яҡын ғариза килә. Район һәм ҡала этаптарын уңышлы үтеүселәргә Өфө тамашасылары алдында сығыш яһау бәхете тейҙе. Бынан тыш, еңеүселәргә Маҡтау ҡағыҙҙары, иҫтәлекле бүләктәр ҙә тапшырылды.
Йәш башҡарыусыларҙың сығыштарын ҡарарға мәктәп уҡыусылары, студенттар, хәрби-патриотик клуб ағзалары ла саҡырылғайны. Концерт барышында ирекмәндәр уларға георгий таҫмаларын таратты. Күптәр был сараның мөһимлеген билдәләп, «Еңеү паркында һуғыш йылдары йырҙары тынмаһын»,-тигән теләген дә белдерҙе.