Ораны –“Аҡтайлаҡ!”, тамғаһы – һәнәк, батыры – Ҡараһаҡал, ғалимы – Әхмәтзәки Вәлиди, ағасы – аҡ өйәңке, ҡошо иһә әтәлге булған Юрматы ырыуы ҡор йыя.

Ойоштороу комитеты хәбәр итеүенсә, 20 майҙа Ишембай районында юрматылар йыйын ҡора, Торатау буйына аҡ тирмәләр теҙеп, ырыуҙаштарҙы ла, башҡа ырыу вәкилдәрен дә, сит-ят тарафтарҙан килгән ҡунаҡтарҙы ла бер майҙанға туплай. 

Ишембай, Стәрлебаш, Стәрлетамаҡ, Федоровка, Мәләүез, Ауырғазы, Ғафури, Баҡалы райондарында, Ишембай, Стәрлетамаҡ, Салауат, Мәләүез ҡалаларында, Ырымбур өлкәһендә, Татарстанда, Венгрияла йәшәүсе ырыуҙаштар йыйынының тәүге өлөшө Ишембай ҡалаһының Мәҙәниәт йортонда (Ленин урамы, 23) иртәнге сәғәт 9-ҙа башлана. Унда ошо көндәрҙә райондарҙа булып үткән йыйындарҙа һайланған делегаттар ҡатнашасаҡ. 
Ә сәғәт 2-лә иһә ырыуҙаштарҙы һәм ҡунаҡтарҙы изге Торатау буйында көтәбеҙ. Торатау буйындағы байрам программаһына 1812 йылғы Ватан һуғышы геройы Ҡаһым Мырҙашев исеменә – милли көрәш, Юрматы ере батыры, 1735-1740 йылдарҙағы башҡорт ихтилалы етәксеһе, Ҡырым ханлығында һәм Осман империяһында башҡорт илселеге ағзаһы булған Килмәк абыҙ Нөрөшев кубогына традицион уҡтан атыу буйынса “Мәргән уҡсы” турниры индерелгән (ярыштарҙа ҡатнашыу өсөн заявкалар ҡабул итеү бара). 

Байрамды юғарыла барланған райондарҙың тирмәләре, шәжәрәләр, халыҡ һөнәрмәндәре эштәре һәм милли ризыҡтар күргәҙмәләре биҙәйәсәк. Һәм, әлбиттә, танылған сәнғәт әһелдәре һәм райондарҙың үҙешмәкәр коллективтары тарафынан ойошторолған ҙур концерт программаһы ла әҙерләнә.

 
Күркәм байрам сараһына башҡа ырыу башҡорттары ла саҡырыла. Яҡты уйҙар, матур теләктәр, асыҡ һәм ихлас күңел менән изге тауыбыҙ эргәһендәге йыйынға рәхим итегеҙ!