Мәжит Ғафури исемендәге Башҡорт академия драма театры «Эҙләнем, бәғерем, һине…» спектакле менән Урта Азия һәм Ҡаҙағстан илдәренең VII Халыҡ-ара театр фестивалендә ҡатнаша.

 Фестиваль 30 октябрҙән 6 ноябргә тиклем дауам итә һәм күренекле дәүләт эшмәкәре Темирбек Жургеновтың тыуыуына 120 йыл тулыуға арнала. «Эҙләнем, бәғерем, һине…» спектакле Ҡаҙағстандың Талдыҡурған ҡалаһында 2 ноябрҙә күрһәтеләсәк.

Ролдәрҙә: Фирғәт Ғарипов һәм Гөлмирә Исмәғилева.

…Бында һөйләгәндәрҙең барыһы ла тәүге минуттан йөрәккә уҡ булып ҡаҙала. Был – ир менән ҡатын мөнәсәбәте тураһында ғына ябай хикәйә түгел, был – бер-беребеҙгә ҡарата бәғерһеҙлек, һәр беребеҙҙең үҙәккә үтерлек яңғыҙлығы хаҡында. Ул тағы ла  шул күңел яраларын уңалтыусы, эске һыҙланыуҙарҙы еңеләйтеүсе тик бер дауа булыуы хаҡындалыр – ул да булһа, мөхәббәт, күңел йылылығы һәм яҡыныңа ҡарата иғтибар…