Башҡорт шағирәһе һәм яҙыусыһы, Рәсәйҙең һәм Башҡортостандың журналистар һәм яҙыусылар союздары ағзаһы, Шәйехзада Бабич исемендәге дәүләт республика йәштәр премияһы лауреаты, Башҡортостандың атҡаҙанған матбуғат һәм киң мәғлүмәт хеҙмәткәре Фәрзәнә Аҡбулатова V халыҡ-ара «Асыҡ Евразия» («Открытая Евразия») конкурсы финалисы.

«Тере таш» хикәйәһе конкурстың “Әҙәби әҫәр” категорияһына ҡараған шорт-листына ингән. Көсөргәнешле бәйгелә 1400-гә яҡын конкурсанттар араһынан финалға 55 бәйгесе һайлап алынған, улар араһында беҙҙең республика данын яҡлаусы Фәрзәнә Аҡбулатова.

Лондонда, 26 ноябрь көнө халыҡ-ара «Асыҡ Евразия» конкурсының еңеүселәре билдәләнәсәк.

Фәрзәнә Фәтих ҡыҙы Аҡбулатова 1960 йылдың 1 февралендә Хәйбулла районы Үрнәк ауылында тыуған. Ғәлиәхмәт урта мәктәбендә белем ала. Артабан Өфөләге 2-се педагогия училищеһының художество-графика бүлегендә уҡый. 1987 йылда Мәскәү дәүләт университетының журналистика факультетын тамамлағас, «Башҡортостан» гәзите редакцияһына эшкә ҡайта. 1991 йылда Башҡортостан телерадиокомпанияһының «Ижад» берекмәһенә эшкә саҡырыла.

Әлеге мәлдә «Юлдаш» радиоһында мөхәррир һәм «Сәхнәгә арналған ғүмер», «Әҙип һәм заман» һәм башҡа тапшырыуҙарҙы алып барыусы.

Фәрзәнә Аҡбулатованың «Атай икмәге», «Зәңгәр ҡаялар» исемле һәм башҡа китаптары күптәребеҙгә яҡшы таныштыр. Тәүгеһендә хикәйәләр тупланған булһа, әҙиптең икенсе йыйынтығында «Ҡорбанлыҡ йәки ябай ғына алыш-биреш», «Тәгәрмәс ҡала йәки донъя кендеге» тигән фантастик повестары һәм яңы хикәйәләре урын алған. «Атай икмәге» китабы өсөн уға 1995 йылда Башҡортостан Республикаһының Шәйехзада Бабич исемендәге йәштәр дәүләт премияһы бирелде.

Хикәйәләр һәм повестар ижад итә, “Атай икмәге”, “Зәңгәр ҡаялар” ,”Я слушала тишину”, “Мөхәббәт”, “Харис и волшебная змея»,.”Неоконченная книга”, “Загнанные кони” китаптары авторы.

Гүзәл Багаева