14 февраль М. Ғафури исемендәге Башҡорт дәүләт драма театры сәхнәһендә Башҡортостандың халыҡ шағиры Рәми Ғариповтың тыуыуына 85 йыл тулыу уңайынан  «ФЕВРАЛЬ. БУРАН…»  спектакле ҡуйыласаҡ.

 Шағир Рәми Ғариповтың ҡатмарлы яҙмышы, һоҡланғыс ижады, һүнмәҫ рухы хаҡында был спектакль. Шағирҙың ҡәләмдәш дуҫтары, ижадташтары, яҡын кешеләре - барыһы ла тормоштан алынған.

Күренекле башҡорт шағиры, тәржемәсе һәм журналист, Башҡортостандың халыҡ шағиры, Салауат Юлаев исемендәге дәүләт премияһы лауреаты Рәми Ғариповтың тормошо һәм ижадына арналған “Февраль.Буран…” исемле ижади проект 2012 йылда бөйөк шағирҙың тыуыуына 80 йыл тулыу уңайынан сәхнәләштерелгәйне. Быйыл йәнә халыҡ шағиры Рәми Ғариповтың тыуыуына 85 йыл тулыу уңайынан тамашасыларға тәҡдим ителә.  

Зөһрә Бураҡаева “Шағир иленә сәйәхәт”те Рәми ағайҙың көндәлегенә һәм тарихи документтарға таянып яҙа. Халыҡ шағирының шиғырҙары, уның һүҙҙәренә яҙылған йырҙар, уйланыуҙары, уның күңел донъяһы – былар барыһы ла әҫәрҙә бермә-бер үрелеп бара.

Шағир ике һында баҫа тамашасы алдына – көндәлектәге Рәми – Артур Кәбиров, тормоштағы Рәми – Фирғәт Ғарипов. Шағирҙың дуҫтары, яҡындары, замандаштары образын театр артистары уйнай.

Ике Рәми бер бөтөн булып баҫҡан кеүек, шағир хаҡындағы спектакль дә проекттың режиссеры Хөрмәтулла Үтәшев тарафынан бер бөтөн, тәрән эстәлекле сәхнә әҫәре итеп ҡуйылған.

Әйткәндәй, Шағирҙың ижадын пропагандалау, исемен мәңгеләштереү һәм уның образын кәүҙәләндереүҙәге хеҙмәте өсөн Хөрмәтулла Ғаззали улы һәм Артур Кәбиров Рәми Ғарипов исемендәге премияға лайыҡ булдылар.

Февраль – Рәми айы - донъяға бөйөк шағирҙы бүләк иткән ай, Рәми Йәғәфәр улы бынан 85 йыл элек 12 февралдә тыуа. Һәм нәҡ февраль айында – 1977-се йылдың 20-се февралендә ул мәңгелеккә күскән.

Әммә беҙҙең йөрәктәрҙә февраль –шағирҙың донъяға килгән айы булып һаҡланһын!