24 сентябрҙә Төркиәнең Адана ҡалаһында халыҡ-ара кинофестиваль асыла. Башҡортостандан билдәле режиссер Булат Йосоповтың “Бабич” фильмы күрһәтелә.

Күренекле башҡорт шағиры Шәйехзада Бабичҡа арналған тарихи фильм Башҡортостан башлығы грантына төшөрөлдө. Был фильм Рәсәйҙең күп кенә кино фестивалдәрендә ҡатнашты.

"Бабич"-башҡорт кинематографияһы тарихында донъя күргән тәүге художество тарихи фильм. Күренекле башҡорт шағиры Шәйехзада Бабичтың тормош һәм ижад юлына арналған яңы кинотаҫма тамашасы алдына үткән быуаттың 1916-1919 йылдарын күҙ алдына баҫтыра.

Фильмдағы бар эпизодтар ҙа тарихи дәлилдәргә, документтарға таянып ижад ителгән. Картина яңы йөҙҙәр, яңы артистар асыуы менән үҙенсәлекле. Милли йәштәр театры актеры Илгиз Таһиров- Шәйехзада Бабич ролен башҡара.