1 май баш ҡаланың «Болоттар» заманса сәнғәт үҙәгендә Бөйөк Еңеүҙең 71 йыллығына арналған яңы күргәҙмә асылды. Экспозицияла һуғышта ҡатнашҡан яугирҙарҙың, тылдағыларҙың үткәне менән танышырға мөмкин. Тарихи фотоһүрәттәрҙе «Ағиҙел» республика фотоклубы ағзалары Башҡортостанда йәшәүселәрҙең ғаилә архивтарынан йыйған, Рәсәйҙең фоторәссамдар Союзы ағзалары иһә ветерандарҙың бөгөнгө тормошон яҡтыртҡан. Күргәҙмә 17 майға тиклем дауам итәсәк. Артабан ойоштороусылар был эштәр менән республика буйлап сәйәхәткә сығасаҡ. Әйткәндәй, «Еңеү һалдаттары» фотопроекты 2005 йылдан старт ала. Әлегә барлығы өс меңдән ашыу эш тупланған.