Алдан хәбәр итеүебеҙсә, кисә - 27 февралдә «Рәсәй.Башҡортостан» телеканалының «Рәсәй» медиа-үҙәгендә «Зөләйха күҙҙәрен аса» романының авторы Гүзәл Яхина менән осрашыу үтте. Сарала Мәжит Ғафури исемендәге Башҡорт академия драма театрының «Зөләйха күҙҙәрен аса» спектаклен ҡуйыусы режиссер Айрат Абушахманов ҡатнашты.
«Өфөгә килеүем минең өсөн бик күптән көтөп алынған ваҡиға ине, әлеге ваҡытта түҙемһеҙлек менән спектаклде көтәм» - тине, Гүзәл Яхина.
Конференциянан һуң Гүзәл Яхина Әхмәтзәки Вәлиди исемендәге Милли китапханала ижади осрашыуҙа ҡатнашты. Китапханала Гүзәл Яхина ике йыл эсендә бер нисә телгә тәржемә ителгән «Зөләйха күҙҙәрен аса» китабының тышлыҡтары коллекцияһы күргәҙмәһен ҡараны.
«Зөләйха күҙҙәрен аса» спектакленән һуң актерҙар һәм ижади төркөм менән спектакль хаҡында фекер алышыу ойошторолдо.