Бына, исмаһам, халыҡсан моң байрамы, халыҡсан тамаша, тип ҡайттыҡ Бибисара Азаматова менән Рәил Өмөтбаевтың концертынан. Зал тулы тамашасы булыуы ла уларҙың ижадын яратҡандарҙың, үҙ иткәндәрҙең күп икәнлеген күрһәтте. Кеше концертҡа йөрөмәй, тиҙәр... Моңдаш, рухташ ижадсыларға нишләп йөрөмәһен инде! “Мөхәббәткә кәртә юҡ” тип аталды концерт. Эйе, йыр-моңға һөйөү, артистарҙың тамашасыһын яратып сығыш яһауы, ә тамашасының уларға мөхәббәте кәртәләр белмәй. Күңелдәге ҡатмарлы йоҙаҡтарҙы ла моңға булған һөйөү асҡысы асып инә, йән рәхәте бүләк итә бит!