25 апрель көнө Хөсәйен Әхмәтов исемендәге Башҡорт дәүләт филармонияһы сәхнәһендә эстрадабыҙҙың иң матур тауыштарының береһе, йәш йырсы, халыҡ-ара, Бөтә Рәсәй һәм республика конкурстары лауреаты Рөстәм Шаһыбалов «Күңелемдә һин генә» тип исемләнгән тамашаға саҡыра. Тамашаның режиссеры - Башҡортостандың атҡаҙанған артисы Сулпан Асҡарова.

 Үткән ижад миҙгелендә «Минең юлым» тип аталған беренсе концерт программаһын тамашасы хөкүменә сығарғайны. Йырсының ижадын яратҡан, йырҙарына ғашиҡ булыусылар һаны тағы ла арта төштө. Йыл дауамында йырсы репертурын иң моңло һәм хисле йырҙар менән тулыландырып, йәнә тамашасыһы менән «яҙ һәм моң тулҡынында» осрашыуға ашыға. 

Тамашала һеҙ яратып тыңлаған эстрада һәм баян, ҡурай моңдарына ҡушылып халыҡ йырҙары, премьералар яңғыраясаҡ.

Ижади дуҫтары Лилиә Ишмйәрова, Алина Дәүләтханова менән башҡарған дуэттар, талантлы баянсылар Айрат Ғәлиев һәм Таһир Шаһивәлиев, танылған ҡурайсы Илнур Хәйруллиндарҙың музыкаль «күстәнәстәре» һеҙгә хуш килер. Шулай уҡ, бөгөнгө көндә йырсы үҙе ижад иткән «Карауан» төркөмө сығышы концертҡа йәм өҫтәр. 

Үҙенсәлекле йырҙары менән тамашасыны үҙенә әсир иткән сәхнә йондоҙо Рөстәм Шаһыбаловтың башҡарыу оҫталығы күптәргә ҙур өлгө булырлыҡ. Бар булмышын үҙенең йөрәк түренән урғылып сыҡҡан моңға һалған йырсы ул.

«Ғүмер», «Бер ауыл балаһы мин», «Ҡурайым», «Бутамағыҙ минең яҙмышымды» һәм башҡа бик күп береһенән-береһе сағыуыраҡ йырҙары бөгөн милли музыка сәнғәтендә айырым бер урын алып тора.