Хоҙай, ахыры, һине шулай
Һоҡланһындар өсөн яратҡан.
Яратҡан да, ситтән ҡарап тороп
Һоҡланғандыр үҙе аҙаҡтан, -
күренекле шағир, актрисаның ғүмер юлдашы Рафаэль Сафин ҡатыны, мәшһүр актриса Гөлли Мөбәрәковаға бағышлаған был шиғри юлдар күптәргә таныш.

9 декабрҙә сәхнәбеҙҙә СССР-ҙың халыҡ артисткаһы, педагог, йәмәғәт эшмәкәре Гөлли Арыҫлан ҡыҙының 80 йәшенә арналған юбилей кисәһе була. Республикабыҙҙың театр йәмәғәтселеге, күп һанлы тамашасылар, туған коллективы, Гөлли Арыҫлан ҡыҙының уҡыусылары юбилярҙы ҙур тантанаһы менән ҡотлаясаҡ, оҙайлы сәнғәт юлында ул башҡарған ролдәр, ҡыҙыҡлы мәлдәр хаҡында хәтергә төшөрәсәк.

Бөгөн дә илһамланып ролдәр ижад иткән, йәштәрсә дәртле, тормошто ихлас яратҡан Гөлли Арыҫлан ҡыҙы был көндө илебеҙҙең, киң республикабыҙҙың төрлө тарафтарынан, хатта сит илдәрҙән дә ҡотлауҙар ҡабул итәсәк, сәхнәлә барған ваҡиғаларҙың уртаһында буласаҡ.

Уҡыусылары, ижадташтары бөтә театр коллективы ҡатнашасаҡ кисә заманса, күтәренке рухта әҙерләнә. 9 декабрь - өлкән актрисабыҙҙың юбилей байрамы тамашасыға ысын мәғәнәһендә илһамлы минуттар бүләк итәсәк.
19.00 сәғәттә башлана.

Сығанаҡ: Мәжит Ғафури исемендәге Башҡорт академия драма театры