Мәжит Ғафури исемендәге Башҡорт дәүләт академия драма театры Айгиз Баймөхәмәтовтың “Ҡалдырма, әсәй” повесы буйынса ҡуйылған “Хылға ҡаршы”спектакле (А.Ишбулдина инсц.) менән Урал аръяғы райондары буйлап гастролгә сыға.

19 апрель - Учалы филармонияһында

20 апрель – Бөрйән районы Иҫке Собханғол мәҙәниәт йортонда

21 апрель – Баймаҡ мәҙәниәт һарайында, 

22 апрель – Сибай Пионерҙар йортонда

23 апрель – Асҡар мәҙәниәт үҙәге

27 апрель - Мораҡ мәҙәниәт йортонда

28 апрель - Иҫәнғол мәҙәниәт йортонда

29 апрель - Аҡъяр мәҙәниәт йортонда

30 апрель - Бүребай мәҙәниәт йортонда (Хәйбулла районы)

1 май - Йәнгел мәҙәниәт йортонда (Әбйәлил районы)

Һәр районда тамаша көнөнә ике тапҡыр уҙғарыласаҡ, көндөҙөн уҡыусылар, ә кисен - ололар өсөн. Тулыраҡ мәғлүмәтте урындағы мәҙәниәт йортонан белешергә мөмкин.

"Хыялға ҡаршы" - бөгөнгө көндә иң популяр спектаклдәрҙең береһе. 2016 йылда Бүрәт Республикаһында уҙғарылған «Алтан сэргэ» Халыҡ – ара театр фестивалендә ике махсус премия яуланы: "Иң яҡшы актер ансамбле" һәм "Хәҙерге милли прозаға мөрәжәғәт иткәне һәм яңы театр телен эҙләүе өсөн" номинацияларында.

Әйткәндәй, ошо уҡ спектакль Х.Намсараев исемендәге Бүрәт дәүләт академия драма театрында ла ҡуйыла. 14, 15 майҙа уның премьераһы Улан-Удэ ҡалаһында үтәсәк, ә инде 21 апрелдән Байкал Аръяғы (Забайкальский) крайы буйлап гастроле ҡаралған.

Әҙәм балаһы бер ваҡытта ла йәмғиәттән тыш йәшәй алмай. Йәмғиәт тәрбиәләй, йәшәү ҡанундарын билдәләй. Хатта атай-әсәйһеҙ һәм ғаиләһеҙ ҡалған хәлдә - уға яңы ғаилә табып бирә. Тап бына шундай осраҡ тураһында ла инде спектаклдең темаһы. Хөкүмәт тәрбиәһе аҫтына алынып та үҙҙәрен яҡлауһыҙ тойған балалар, уларҙың күңел кисерештәре, яҙмыштары тарафынан ҡыйырһытылыуы һәм барлыҡ ҡаршылыҡтарҙы еңеп сығырлыҡ хыялдарына тоғро ҡалып, уның артынан барыуҙары тураһында был сәхнә әҫәре.

Ильяс, Фәрит, Саша, Даян, Алина, Динис, Дима, балалар йорто директоры, тәрбиәләнеүселәр, опекундар, тикшереүселәр – был әҫәрҙең геройҙары. Спектаклдә бихисап ролдәр булыуына ҡарамаҫтан, уларҙы ни бары ете актер уйнай: Артур Кәбиров, Урал Әминов, Ринат Баймырҙин, Фәнис Рәхмәтов, Морат Рафиҡов, Айҙар Шәмсетдинов, Алмаз Йосопов. Спектакль дауамында йәш артистар, әллә нисә төрлө ҡиәфәткә инеп, балалар йортонда йәшәгән тәрбиәләнеүселәр яҙмышын бәйән итә. Спектаклде ҡараусы тамашасылар улар менән бергә йәшәй, шатлана, илай һәм ҡайғыра...