Күптән түгел Хәйбулла районы Сиҙәм ауылында күп функциялы мәҙәни үҙәк асылды. Элекке клуб бинаһын хәҙер танырлыҡ та түгел, тышҡы һәм эске яҡтан биҙәкләү эштәре башҡарылған, ҡыйығы, матди-техник базаһы яңыртылған. Хореография дәрестәре өсөн айырым зал, фольклор мөйөшө, балаларға уйын бүлмәһе булдырылған. Шулай уҡ китапхананың күп функциялы мәҙәни үҙәккә күсеүе - уҡыусылар һанын тағы ла арттырыр тип көтөлә.
Ауыл халҡы хәҙер бында килеп спорт менән дә шөғөлләнә ала, тренажерҙар ҡуйылған, фойела теннис һәм бильярд уйнарға мөмкин. Шашка, шахмат һөйөүселәр өсөн турнирҙар ҙа ойошторола башлаған. Билдәле булыуынса, мәҙәниәт йортонда капиталь ремонт эштәрен башҡарыу, матди-техник базаһын нығытыуға республика һәм район бюджетынан яҡынса биш миллион һум аҡса бүленгән.