Хөсәйен Әхмәтов исемендәге Башҡорт дәүләт филармонияһы хәбәр итеүенсә, Төркилә үтәсәк «Апимондия» халыҡ-ара умартасылыҡ конгресының (45th Apimondia International Apicultural Congress) мәҙәни сараларында филармония артистары ҡатнашасаҡ.

45-се тапҡыр ойошторолған был форум 29 сентябрҙән 4 октябргә тиклем Истамбул ҡалаһында уҙғарыла. Мәртәбәле сарала Төркиә, Дания, Сербия, Словения йәмғеһе йөҙгә яҡын ил вәкилдәре ҡатнаша. Рәсәй исеменән Башҡортостан Республикаһы умартасылары сығыш яһай. 

Хөсәйен Әхмәтов исемендәге Башҡорт дәүләт филармонияһы солистары: Башҡортостандың халыҡ артисы Римма Амангилдина, халыҡ-ара һәм республика конкурстары лауреаттары Марсель Ҡотоев (вокал) һәм Илнур Хәйруллин (ҡурай), Башҡортостан Республикаһының Халыҡ ҡоралдары милли оркестры музыканты Ольга Сидорова (ҡыл-ҡумыҙ) һәм әҙәби-музыкаль лекторий солисы Альберт Зәйнуллин байрамдың мәҙәни өлөшөндә сит ил вәкилдәренә халҡыбыҙҙың рухын, данлы тарихын, матур һәм бай мәҙәниәтен ҡурай моңдары, ҡыл-ҡумыҙ сыңдары һәм моңло халыҡ йырҙары аша еткерәсәк.