Кисә,  24 май көнө Хөсәйен Әхмәтов исемендәге Башҡорт дәүләт филармонияһы 78-се концерт миҙгеленә йомғаҡ яһаны. «Отчетны(ки!)й концерт”  исемле тамаша ҡарарға халыҡ дәррәү килгән, ойоштороу кимәле лә юғары ине.

Тантаналы рәүештә миҙгел ябыу тамашаһы филармония коллективтарында хеҙмәт итеүсе юбиляр сәнғәт әһелдәрен тәбрикләү менән үрелеп барҙы.

Тамашасылар бигерәк тә “Ҡыҙыҡ һәм Мәҙәк” төркөмөнең етәксеһе, Башҡортостан Республикаһының халыҡ артисы Вәлит Илембәтовты ялҡынлы алҡыштар менән ҡаршы алды.

Шулай уҡ быйыл күркәм юбилейын билдәләүсе “Далан” төркөмөнең етәксеһе, Башҡортостан Республикаһының халыҡ артисы Артур Туҡтағолов дәртле йырҙары менән күңелдәрҙе күтәрҙе.

Барлыҡ тамашасылар ҙа Башҡортостандың халыҡ артисы, эстрадабыҙҙың яҡты йондоҙо, шулай уҡ 50 йәшлек юбилейын билдәләүсе Фәдис Ғәниевтың сығышын ихлас ҡабул итте.

Филармонияның аккомпианоторы, Башҡортостан Республикаһының атҡаҙанған һәм халыҡ артисы Ғәли Алтынбаевтың сығышы залда ултырыусыларҙың береһен дә әсир итмәй ҡалмағандыр. «Ҡарауан» эстрада төркөмө һәм күптән түгел генә 75 йәшен билдәләп үткән Музыкаль-әҙәби лекторий сығыштары тамашасылар тарафынан ихлас ҡабул ителде.

 “Үткәндәргә алға” девизы аҫтында уҙғарылған байрам кисәһендә филармонияның алдынғы коллективтары һәм солистары сығыш яһаны. Линар Дәүләтбаев етәкселегендәге Башҡортостан Республикаһының Милли халыҡ инструменттары оркестры, Олег Ҡасимов етәкләгән эстрада-джаз оркестры һәм  Т. Сәйфуллин исемендәге Дәүләт академия хор капеллаһы (етәксеһе Алһыу Хасбуллина) залда ултырыусыларға матур һәм илаһи ял минуттары бүләк итте.

«Отчетны(ки!)й концерт” тамашаһы ҡунаҡтарына 2017 йылдың иң уңышлы премьера проекттары тәҡдим ителде: “Ҡурай байрамы. Ел тыуҙырған моң”, “Иң шәп көн”, Күләгә музыкаһы”, “Сәнғәт менән диалог”, “Виртуаль концерт залы” һ.б.

Филармония коллективы күренекле башҡорт  композиторы Салауат Низаметдиновты иҫкә алды, мәңгелек йырҙар ижад итеүсегә быйыл, март айында 60 йәш тулған булыр ине.

Байрам тамашаһында Хөсәйен Әхмәтов исемендәге Башҡор дәүләт филармонияһы менән йыл буйына хеҙмәттәшлек итеүсе партнерҙар-киң мәғлүмәт саралары хеҙмәткәрҙәре рәхмәт хаттары менән бүләкләнде.

Филармония фойеһында тамашасылар өсөн концерт алдынан да, антракт мәлендә лә уйын-көлкө, ҡыҙыҡлы һәм мауыҡтырғыс викториналар ойошторолғайны.

Филармонияның мәғлүмәт үҙәге хәбәр итеүенсә, яңы миҙгел тағын да бай булмаҡсы, үҙенсәлекле проекттар вәғәҙәләйҙәр.  

Концерттың фотоотчеты ошо һылтанмала  здесь. 

Автор: Гүзәл Багаева

Фото: Ирина Ғәйнәтуллина