Башҡортостан юлдаш телевидениеһы хәбәр итеүенсә, күптән түгел Иглин районының балалар музыка мәктәбенә 50 йыл тулған.  Йәш сәхнә оҫталары күркәм датаны бай йөкмәткеле  тамаша менән билдәләне.

Иглин музыка мәктәбе  ата-әсәләрҙең һорауы буйынса 1966 йылда асылған.  Тәүҙә уҡытыусылар ҙа, түңәрәктәр ҙә аҙ була, әммә йылдар үтеү менән музыка мәктәбе  йәш һәләттәр әҙерләүсе төп мәркәзгә әүерелә.

Бында шөғөлләнергә теләүселәр  артыуын иҫәпкә алып тәүҙә Урман, Оло Тәләк  тә, һуңғараҡ Балтика,  Таутимән, Күҙәй ауылдарында филиалдар асыла.  10 йыл элек музыка мәктәбенә РСФСР-ҙың һәм БАССР-ҙың халыҡ артисы, Салауат Юлаев исемендәге дәүләт премияһы лауреаты Мәғәфүр Хисмәтуллиндың исеме бирелә.  Иглин мәктәбе бөгөн республиканың мәҙәни донъяһында лайыҡлы урын биләй, күп сығарылыш уҡыусылары киләсәген сәнғәт менән бәйләй, ә түңрәктәрҙә шөғөлләнеүселәр Башҡортостан данын яҡлай. 

50  йыллыҡ юбилейға арналған байрам концерты педагогтарҙың һәм уҡыусыларҙың сығыштары менән үрелеп барҙы. Ата-әсәләр фекеренсә, музыка мәктәбе күптән балаларҙың икенсе тыуған йортона әйләнгән. Был берҙән, буш ваҡытты файҙалы үткәреү мөмкинлеге бирһә, икенсенән, уҡыусылар  йыр-моң донъяһында  матурлыҡты тойорға өйрәнә. Музыка мәктәбендә шөғөлләнеүселәр район, республика кимәлендә үткәрелгән сараларҙың уртаһында ла ҡайнай.