Күптән түгел Мәжит Ғафури исемендәге Башҡорт дәүләт академия драма театрында Рәсәйҙең атҡаҙанған, Башҡортостандың халыҡ артисы Илдар Сәйетовтың юбилей бенефисы үтте.

Кисә Айгөл Әхмәтғәлиева пьесаһы буйынса режиссер Айрат Абушахманов ҡуйған "Ул бит кисә ине" лирик комедияһы менән асылды.

Юбилярҙы ҡотлап Башҡортостан Республикаһы Мәҙәниәт министры урынбаҫары Шамил Абдраҡов Маҡтау грамотаһы һәм Башҡортостан Республикаһы Хөкүмәте Премьер-министры Салауат Тәлғәт улы Сәғитовтан ҡотлау хатын тапшырҙы.

 Башҡортостандың Театр эшмәкәрҙәре союзы вазифаһын башҡарыусы Хөрмәтулла Үтәшев Илдар Ширҡәт улын К.С.Станиславский исемендәге миҙал менән бүләкләне.  

Юбилярҙы М.Горький исмендәге Ырымбур дәүләт драма театрының художество етәксеһе Рифҡәт Исрафилов, театрҙың директоры Павел Церемпилов, Илдар Сәйетовтың яҡташтары - баҡалылар һәм, әлбиттә, яратҡан башдрамдар ихлас күңелдән ҡотлап, матур теләктәрен еткерҙе.

Сәйетов Илдар Ширҡәт улы 1957 йылдың 25 ғинуарында Баҡалы районының Баҡалы ауылында тыуған. Баҡалыла 2-се һанлы урта мәктәпте тамамлағас, урындағы кирбес заводында эшләй, хәрби хеҙмәтен үтәй. 1983 йылда Өфө дәүләт сәнғәт институтынының  театр сәнғәте факультетын тамамлай.

2-се һанлы телевизион каналындағы Башҡорт телевидениеһында эшләп, «Китап тартмаһында», «Сатира һәм юмор» тапшырыуҙарын алып бара. «Беҙ өсәү инек», «Кинйә» телефильмдарында төшә.

Спектаклдәрҙәге ролдәре: Адвокат Нагело «Илай белмәй торған ҡатын», Андрей «Апалы-һеңлеле өсәү», Буштец «Рядовойҙар», Великатов «Таланттар һәм баш эйеүселәр»,  Вилдан «Бибинур, ах, Бибинур!», граф Федерико «Бесән өҫтөндәге эт», капитан Казарян «Ярлыҡау», Ҡудашев «Һуңғы уҙаман»,Кудашев «Ун өсөнсө председатель», Кудимов «Өлкән улым», Тимербай «Эх, дуҫҡайым Байтимер», Толпар «Ос, Толпарым!» , Ялсығол «Ай тотолған төндә”.

Билдәле һәм талантлы актер Омар — «Айыу» (Медведь 2005),Полковник Безухов — «Ирлән көнө, йәки Урыҫ бәхете» (День хомячка 2003) фильмдарында уйнай.

Илдар Сәйетов- Рәсәй Федерацияһының атҡаҙанған, Башҡортостан Республикаһының атҡаҙанған һәм халыҡ артисы, А. Мөбәрәков исемендәге һәм «Туғанлыҡ» премиялары лауреаты.

Гүзәл Багаева