Иртәгә -16 февраль Башҡорт дәүләт опера һәм балет театры коллективы Баязит Бикбайҙың билдәле «Салауат Юлаев» операһын тамашасы хөкөмөнә яңы ҡуйылышта тәҡдим итә.

Башҡорт дәүләт опера һәм балет театры сәхнәһендә тәүге тапҡыр «Салауат Юлаев» операһы 1955 йылда сәхнәләштерелә.  
Бөгөн «Салауат Юлаев» операһы яңы һүрәтләнештә сәхнәгә ҡабат сығарылды. Төп партияла Башҡортостандың атҡаҙанған артисы, «Алтын битлек» милли театр премияһы лауреаты Илһам Вәлиев сығыш яһай.

Башҡорт операһы тарихы тап уҙған быуаттың 50-се йылдарына барып тоташа. Мәскәү консерваторияһының сығарылыш уҡыусыһы Заһир Исмәғилевтың Баязит Бикбай либреттоһына яҙған диплом эше, сәхнәлә үҙ урынын ала. 1955 йылда Мәскәүҙә уҙғарылған Бөтә Союз әһәмиәтендәге ҙур мәҙәни сарала - Башҡорт сәнғәте һәм әҙәбиәте декадаһында ла тәҡдим ителә. Хатта, Бөтә Союз радиоһы аша трансляциялана. «Салауат Юлаев» Башҡорт опера театры репертуарында һәр ваҡыт мөһим урынды алып торған.

Легендар әҫәр сәхнәгә бөгөн бишенсе тапҡыр сығарылды. Тәүгеһе 1955 йылда булһа, унан һуң 1977, 1988 һәм 1994 йылдарҙа сәхнәләштерелә. Классика сәнғәт әҫәренә ҡарата мөнәбәсәт ваҡыт үҙгәрештәренә бәйле. Шулай ҙа «Салауат Юлаев» операһы нисәмә быуын тамашасыһының милли символы, легенда, йылъяҙмаһы һәм күп яҡлы рухи-мәҙәни билдә булыуы менән алдыра.

Әлеге ҡуйылыш заманса алымдар, видеоинсталяция менән байытылған. «Салауат Юлаев» операһы  нисәмә быуын тамашасыһы өсөн милли символ, легенда, йылъяҙма булып ҡала алыуы менән мөһим.