18 майҙан алып 22-нә тиклем Сибайҙа «Ирәндек моңдары» тѳбәк-ара башҡорт халыҡ йырҙарын башҡарыусылар конкурсы уҙғарыла.
Конкурстың ойоштороусылары – БР Мәҙәниәт министрлығы, Республика халыҡ ижады үҙәге, Сибай ҡалаһы хакимиәте.
«Ирәндек моңдары» башҡорт йыр сәнғәтен пропагандалау һәм талантлы башҡарыусыларҙы асыҡлау маҡсатында уҙғарыла.
Конкурстың бурыстары: халыҡ башҡарыусанлығы традицияларын һаҡлау һәм үҫтереү; башҡорт фольклорының боронғо ҡатламдарын тергеҙеү; республиканан ситтә йәшәүсе башҡорттар менән төбәк-ара мәҙәни бәйләнештәрҙе үҫтереү.
Конкурста 35 йәшкә тиклемге үҙешмәкәр һәм профессиональ башҡарыусылар ҡатнаша ала. Башҡарыусылар 16 йәшкә тиклем һәм 16 йәштән алып 35 йәшкә тиклемге ике төркөмгә бүленә. Ғаризалар 10 майға тиклем ҡабул ителә. “Ирәндек моңдары” төбәк-ара башҡорт халыҡ йырҙарын башҡарыусылар конкурсы Сибайҙа 1996 йылдан алып ойошторола. Ижади бәйге ике йылға бер уҙғарылып килә.