30 июндә М.В. Нестеров исемендәге Башҡорт дәүләт сәнғәт музейында Рәсәй рәссамдар союзы ағзалары, педагогтар, республика, төбәк, халыҡ-ара күргәҙмә-конкурстар дипломанттары һәм лауреаттары Илдар һәм Ләйсән Ғилмановтар, «Ҡусҡар» ижад берекмәһе ағзаһы, «Ҡошмау» ижад берекмәһе етәксеһе, республика һәм бөтә Рәсәй ҡорама фестивалдәре дипломанты Гүзәл Мостафина менән ижади осрашыу булып үтте.

«Йәйге каникулдар» күргәҙмәһе музейҙың «Ижад» залында бара һәм һынлы сәнғәт, графика, арт-объектар, биҙәү-ҡулланма сәнғәте жанрҙарын күрһәтә. Осрашыуҙа ҡатнашыусылар йәмле күргәҙмәне һәм йылы атмосферала үткән кисәне оҡшатып, бындай күргәҙмәләрҙе йыл да үткәрергә тигән теләктә хушлашты.