Эвита Гайнет... Зәңгәр экрандар, айырыуса Интернет селтәре аша үҙенсәлекле видеоклиптары менән әҙәбиәт һөйөүселәрҙең күңелен әсир иткән ошо серле һылыу кем ул?! Әле Санкт-Петербургта йәшәгән һәм ижад иткән, күптән инде үҙ уҡыусыһын тапҡан йәш, көслө шағирә Эвита Гайнеттың Инйәр ҡыҙы булыуын, моғайын, күптәр белмәйҙер ҙә. Эйе-эйе, Инйәр һауаһын һулап, Инйәр һыуында ҡойоноп үҫкән ул Эвита. IX класҡа тиклем Инйәрҙең 3-сө мәктәбендә белем ала. Артабан уҡыуын Өфө медицина колледжында дауам итә. Студент йылдарынан уҡ ижади йәһәттән үҙен танытып өлгөрә Эвита. Шаяндар һәм отҡорҙар клубы, йыр-бейеүгә, һүҙгә маһирлыҡ талап иткән һәр сараның уртаһында ҡайнай һәләтле ҡыҙ.
2007 йылда Эвита игеҙәге Кира менән йәш башҡорт режиссеры Руслан Юлтаевтың тулы метражлы "Сыйылған эҙ" ("Царапина") фильмында төп ролдәрҙе башҡара. Ҡыҙҙарға Рәсәй киноһы күгендә танылыу яулаған Михаил Ефремов, Алексей Булдаков һәм Владимир Толоконников кеүек актерҙар менән бергә уйнау бәхете йылмая. Әйткәндәй, "Сыйылған эҙ" тәүге башҡорт триллеры булараҡ та билдәле. 2009 йылда Эвита Санкт-Петербургта Кино һәм телевидение дәүләт институтына уҡырға инә. Илебеҙҙең төньяҡ баш ҡалаһы дәрт-дарманы ташып торған һәләтле ҡыҙҙы шунда уҡ үҙ күрә: яңы юлдар аса, моңға, һүҙгә сарсаған күңелен илһамландырып Шиғриәт тигән серле донъяға алып инә. Тормошҡа, кешеләргә, улар араһындағы мөнәсәбәттәргә, кешелекте һәр саҡ ҡыҙыҡһындырған мәңгелек төшөнсәләргә ҡарата үҙенсәлекле, тәрән фекер йөрөткән Эвита тиҙ арала әҙәбиәт һәм сәнғәт әһелдәренең иғтибарын йәлеп итә. Шиғриәттә үҙ һүҙен тапҡан һылыуҙы тиҙҙән Санкт-Петербург, Мәскәү ҡалаларында үткән төрлө әҙәби кисәләргә, осрашыуҙарға саҡыра башлайҙар.
2015 йылда Эвита "Рәсәй-Башҡортостан" телеканалында ойошторолған "Минең һеҙгә әйтер һүҙем бар..." әҙәби проектында ла ҡатнаша. Конкурс шарттары буйынса сәйәсмәндәр, йәмәғәт эшмәкәрҙәре, актерҙар, журналистар һәм башҡалар шиғырҙар уҡып, үҙҙәренең оҫталыҡтарын күрһәтә. Ниһайәт, мәҙәниәт һәм сәнғәт донъяһында танылған абруйлы, үтә талапсан жюри ағзалары тарафынан проектҡа йомғаҡ яһалып, еңеүсе билдәләнә - шиғриәт күгендә Эвита исемле йондоҙ ҡабына. Тамашасыны үҙенең эскерһеҙлеге, ихласлығы менән арбап, ул "Һүҙ магистры" титулына эйә була,, шулай уҡ юғары намыҫлылыҡ һәм зирәклек символы - Көмөш шпага менән бүләкләнә. Был еңеүе шағирәне тағы ла илһамландырып, ҡанатландырып ебәрә.
2015 йылда кисергән оло ҡайғы Эвитаның нурлы донъяһын аҫтын-өҫкә килтерә. Көтмәгәндә ғәзиз кешеһе - әсәһе вафат була. Был юғалтыу шағирәнең ижадына ла ҙур йоғонто яһай - мөхәббәт һәм бәхет ипкене бөркөлгән ижад емештәре моңһоулыҡ, олпатлыҡ, тәрән уйланыуҙар менән алышына.
Бөгөнгө көндә Эвита Өфө "Китап" нәшриәтендә "Йәштәр тауышы" серияһында сығасаҡ йыйынтыҡ өҫтөндә эшләй. Китап сығарыу менән бер рәттән, ижадына ғашиҡ әҙәбиәт һөйөүселәрҙе ҡыуандырып, шиғри кисәләр ҙә ойоштора. "Мине күрергә кил..." исемле тәүге әҙәби-музыкаль кисәһе 30 октябрҙә тыуған ауылы - Инйәрҙә үтте. Шығырым тулы зал йәш шағирәнең һәр сығышын көслө алҡыштарға күмде. Әллә күпме йән иретер йылы һүҙҙәр, күҙҙе ҡамаштырыр гөл-сәскәләр, иҫтәлекле бүләктәр... Ә иң мөһиме - ике яҡтан да эркелгән ихласлыҡ, ябайлыҡ, эскерһеҙлек... Яҡташтарының һөйөүе, ихлас ғорурланыуы, һоҡланыуы Эвитаның иңдәренә ҡанат ҡуйғандай булды. Яҡын арала ошондай уҡ шиғри кисәләр Белорет һәм Өфө ҡалаларында үтәсәк. Йөрәк моңона, һүҙ тылсымына арбалып, күңелегеҙгә шифа алып ҡайтҡығыҙ килһә, Эвита менән осрашыуға рәхим итегеҙ, дуҫтар!

Гөлшат ҒӘЛИУЛЛИНА.

Сығанаҡ: “Урал” гәзите