Туймазы театры ижад коллективының замана драматургы Валерий Шергиндың “Колбаса. Фрагменттар” тип исемләнгән пьесаһы буйынса яңы спектакль әҙерләй башлауы хаҡында хәбәр иткәйнек инде. Спектаклдең режиссеры—Екатеринбургта уңышлы эшләп килгән “Коляда-театрының” актеры, режиссер Антон Владимирович Бутаков.

Күптән түгел  Заһир Исмәғилев исемендәге Өфө дәүләт сәнғәт институты уҡытыусылары, театр белгестәре  Рида Буранова,  Айһылыу Сәғитова,  Рима Харисова Туймазы татар дәүләт театры тәҡдим иткән Валерий Шергинның “Колбаса. Фрагменттар.” тип исемләнгән пьесаһын ҡарап ҡайттылар. Театрҙың матбуғат хеҙмәте хәбәр итеүенсә, Өфөнән килгән театр белгестәре спектаклгә тәрән һәм деталле анализ яһаны, ҡуйылыштың ыңғай һәм кире яҡтарын билдәләне.

Театрҙың тап ошо сәхнә әҫәренә туҡталыуы осраҡлы түгел. 2016 йылда Туймазы театрында Замана драматургияһы һәм режиссураһы үҙәге ярҙамы менән тәүгеләрҙән булып йәш режиссерҙар лабораторияһы уҙған ине. Антон Бутаков “Колбаса.Фрагменттар” әҫәренә эскиз яһап лабораторияла ҡатнашты. Йәш режиссерҙың эше тамашасылар тарафынан иң күп тауыш йыйған хеҙмәт булды. 

Туймазы театры 2011 йылда танылған режиссер, актер, прозаик, драматург, сценарист К.Станиславский исемендәге Халыҡ-ара премия лауреаты, Россияның атҡаҙанған сәнғәт эшмәкәре Николай Коляданың әҫәре буйынса “Тю-тю, мөхәббәт йәки Тауыҡбаш” исемле комедия сәхнәләштергән ине. Ул спектакль үҙенең бик күп тамашасыларын тапты, Екатеринбургта уҙған «Коляда-PLAYS» Халыҡ-ара замана драматургияһы театр фестивалендә “Фестивалдең асышы” булараҡ танылды.

“Колбаса.Фрагменттар”ҙың авторы Валерий Шергин да, Антон Бутаков та Николай Владимирович Коляданың уҡыусылары.

Спектаклдең премьераһы 27, 28 март көндәренә билдәләнгән.