Кәбир Мөхәмәтшәрип улы Аҡбашев 1932 йылдың 10 мартында Ғафури районы Биҙәүләт (Яңы Заһит) ауылында тыуа. Сәйетбаба урта мәктәбендә, Стәрлетамаҡ педагогия институтында белем ала.

Кәбир Аҡбашев институтты тамамлағандан һуң Ғафури районының Яугилде ауылында уҡытыусы булып эш башлай. Артабанғы тормошон журналистикаға бағышлай. Тәүҙә Красноусолда, һуңынан Стәрлетамаҡта «Ауыл тормошо» гәзитендә эшләй. Стәрлетамаҡта Башҡортостан дәүләт радио комитетының филиалын асыуға өлгәшә һәм оҙаҡ ҡына уның баш мөхәррире була.

 Намыҫлы хеҙмәте Башҡортостандың атҡаҙанған мәҙәниәт хеҙмәткәре тигән маҡтаулы исем менән билдәләнә. Байтаҡ йылдар Башҡортостан Яҙыусылар ойошмаһының Стәрлетамаҡтағы бүлексәһенә етәкселек итә.

Кәбир Аҡбашев айырыуса драматургия өлкәһендә уңышлы эшләй. «Ашҡаҙар», «Китмә, Рөстәм!», «Йәшлегем тирәктәре», «Өмөтөм һин, Аҡтолом» кеүек сәхнә әҫәрҙәрен яҙа. «Сибәркәй»  һәм «Һипкелле ҡыҙ» исемле һуңғы ике пьесаһы өсөн уға ҡалабыҙҙың Ғәли Ибраһимов исемендәге премияһы бирелә.

Әҙиптең бөтә әҫәрҙәре лә тормошсан булыуы менән айырылып тора. Шуға ла режиссерҙарҙы уның һәр әҫәре даими ҡыҙыҡһындыра, сәхнәләрҙә ҡуйылып бара. «Ут күршеләр» комедияһы театр сәхнәһенән оҙаҡ йылдар төшмәй. Мәжит Ғафуриҙың яҙмышы хаҡындағы драма өсөн ул Ғафури районының Жәлил Кейекбаев исемендәге премияһына лайыҡ була.

Кәбир Аҡбашев балалар өсөн дә драма әҫәрҙәре яҙа. «Һыу урлаусылар», «Илама, Бөркөтөм» кеүек сәхнә әҫәрҙәре, шулай уҡ «Һаумы, ҡояш!», «Сыйырсыҡ сәпәкәй итә», «Аҡҡош ниңә илай?»  исемле китаптары үҫеп килгән быуын өсөн үтә лә фәһемле.